Den Bibel, Inhoudende dat Oude ende Nieuwe Testament (Biestkensbijbel)

¶ Den .xlv. Psalm.

1

Een Bruyt liedt ende onderwijsinghe der kinderen Korah vander Roose voor te singhen.

2

⁺MIjn herte dichtet een fijn Liet: Ick wil singhen van eenen Coninck: Mijn tonghe is een penne eens goeden schrijuers.

+ A vers 2

3

Ghy zijt de schoonste onder de menschen kinderen:^† Lieffelijck zijn uwe lippen, daerom seghent v God eewelijck.

† Gratioes.

4

Gordet dijn^† sweert aen dijner sijden, ghy Helt, ende verchiert v schoon.

† Ephe. 6.c.17. Apoc. 19.b.15.

5

Het moet v ghelucken in uwer Cyragien, Trect henen der waerheyt te goede, ende de ellendige by rechte te behouden, soo sal uwe rechter hant wonder bewijsen.

6

Scherp zijn uwe pijlen, dat de volcken voor v nederuallen, midden onder de Vianden des Conincx.

7

^+* Godt, uwen stoel blijft altoos ende eewelijck: Den Scepter ws Rijcx, is een rechtuaerdich Scepter.

+ B vers 7

* Heb. 1.b.8.

8

Ghy^† bemint de gherechticheyt, ende haet een Godloos wesen: Daerom heeft v Godt, uwen God, gesalft met vruechden olie, meer dan uwe ghesellen.

† Psal. 11.a.8.

9

Vwe Cleederen zijn enckel Myrrhe, Aloes, ende Kesia, als ghy wt den yuooren Palleysen daer henen treedt in uwer schoonder heerlijcheyt.

10

In uwe cieragie gaen der Coningen dochteren: De Bruyt staet tot uwer rechter hant in enckel costelijck gout.

11

Hoort dochter, siet daer op ende neyghet uwe ooren:^† Vergheet dijns volcx, ende dijns Vaders huys.

† Deute. 33.a.9. Mat. 19.d.29 Luc. 14.e.26.

12

⁺Soo sal de Coninck lust aen uwe schoonheyt hebben: Want hy is dijn HEEre, ende ghy sult hem aenbeden.

+ C vers 12

13

De dochter^*† zor sal met gheschencken daer zijn: De rijcke int volck sullen voor v^† vleyen.

* Oft Tyri.

† Esai. 23.c.18.

† Smeecken. Ezech. 27. 28.

14

Des Conincx dochter is gants heerlijck inwendich: Sy is met gulden stucken becleet.

15

Men leytse in ghesticte cleederen totten Coninck, Ende haer speelghenooten, de maechden die haer nagaen, leytmen tot v.

16

Men leytse met vruechden ende blijschappen, ende gaen in des Conincx Palleyse.

17

In de stede uwer Vaderen suldy kinderen crijghen: Die suldy tot Vorsten setten inder gantscher werelt.

18

Ick wil ws Naems ghedencken van kint tot kints kinde: Daerom sullen v dancken de volcken altoos, ende eewelijck.