Den Bibel, Inhoudende dat Oude ende Nieuwe Testament (Biestkensbijbel)

¶ Den .xliiij. Psalm.

1

Een onderwijsinge der kinderen Korah, voor te singhen.

2

⁺GOdt, wy hebben met onsen ooren ghehoort.^† Onse Vaders hebbent ons vertelt, wat ghy gedaen hebt tot haren tijden van outs.

+ A vers 2

† Deut. 6.b.7.

3

Ghy hebt met dijner hant de Hey-

[p. 207r]

denen verdreuen, maer haer hebt ghi ingheset: Ghy hebt de Volcken verdoruen, maer haer hebdy wtghebreyt.

4

^* Want sy en hebben dat lant niet inghenomen door haer sweert, ende haren arm en hielp haer niet: Maer uwe rechter hant, uwen arm, ende dat licht ws aensichts, want ghy hadt een welbeuallen aen haer.

* Deut. 9.a.3.

5

^* Godt ghy zijt de selue mijn Coninc, ghy die Iacob hulpe toesegt.

* Psal. 93.a.1.

6

Door v willen wy onse Vianden omstooten:^† In uwen Naem willen wy tonder treden, die haer teghen ons setten.

† Psal. 118.a.10.

7

Want ick en verlate my niet op mijnen boghe: Ende mijn sweert en can my niet helpen.

8

Maer ghy helpt ons van onsen Vianden: Ende maect te scanden die ons haten.

9

Wy willen daghelijcx roemen van Godt, ende dijnen Naem dancken eewelijck. Sela.

10

⁺Waerom verstoot ghy ons dan nv, ende laet ons te schanden worden? Ende en trect niet wt onder onse Heyr?

+ B vers 10

11

Ghy laet ons vlien voor onse Vianden, dat ons beroouen die ons haten.

12

^* Ghy laet ons opsloecken ghelijck Schapen: Ende verstroyt ons onder de Heydenen.

* Esa. 53.b.9.

13

Ghy vercoopt dijn volck^† om niet, ende en neempter niet voor.

† Sonder profijt.

14

^* Ghy maect ons tot versmaetheyt onsen nabueren, tot eenen spot ende gheck, den ghenen die rontom ons zijn.

* Psa. 79.a.4 31.b.12.

15

^* Ghy maect ons tot een byspruecke onder de Heydenen, ende dat de Volcken dat hooft ouer ons schudden.

* 3.Reg. 9.b.7.

16

Dagelijcx is mijn versmaetheyt voor my: Ende mijn aensicht is vol schanden.

17

Dat ic de scheynders ende lasteraers hooren, ende de Vianden ende Wraeckghierighe sien moet.

18

Dit al is ouer ons ghecomen, ende en hebben ws doch niet vergheten, noch ontrouwelijck in dijn verbont ghehandelt.

19

Onse herte en is niet afgeuallen, noch onsen ganck geweken van uwen weghe.

20

Dat ghy ons alsoo in stucken slaet onder de draken, ende bedect ons met duysternisse.

21

⁺Wanner wy des Naems onses Gods vergheten hadden, ende onse handen opgheheuen tot eenen vreemdem Godt.

+ C vers 21

22

Dat conde God wel vinden^† nv kent hy ymmers onses herten gront.

† Psal. 7.b.10. Iere. 17.b.10.

23

Want^* wy worden ymmers om uwen twille daghelijcx verworcht, ende zijn gheacht als slachschapen.

* Rom. 8.e.36 4.Es. 15.b.10

24

^† Ontweckt v op HEEre, waerom slaept ghy? Waect op, ende en verstoot ons niet soo gheheelijck.

† Psal. 89.f.47

25

Waerom verberghet ghy uwe aensicht, verghetet onser ellenden ende benautheyt.

26

^* Want onse siele is ghebuycht ter Aerden: Onsen buyc cleeft aen den Aertbodem.

* Psal. 119.d.25

27

Maect v op, helpt ons, ende verlost ons, om uwer goetheyt wil.