Den Bibel, Inhoudende dat Oude ende Nieuwe Testament (Biestkensbijbel)

¶ Den .xlij. Psalm.

1

Een onderwijsinge der kinderen Korah, voor te singhen.

2

⁺GHelijck dat Hert crijscht na versch water, so crijscht mijn Siele, God, tot v.

+ A vers 2

3

^* Mijn siele dorst na Gode, na den leuendighen Godt: Wanneer sal ick daer henen comen, dat ick Gods aensicht aenschouwe?

* Psal. 63.a.2. 143.a.6.

4

^* Mijn tranen zijn mijn spijse dach ende nacht, de wijle men daghelijcx tot my seyt:^† Waer is nv dijn Godt?

* Psal. 80.a.6.

† Psal. 115.a.2. 79.b.10.

5

Wanneer ick dan daer aen gedencke,^* so schudde ick mijn hert wt by my seluen: Want ic wilde gheerne henen gaen met den hoope, ende met hen wandelen totten huyse Gods, met vrolijcheyt ende dancken, onder de hoopen die daer vieren.

* Psal. 62.b.9

6

Wat^† bedroeft ghy v mijn siele, ende zijt so onrustich in my? Wacht op Godt, want ic sal hem noch dancken, dat hy my helpt met zijnen aenghesichte.

† Psal. 42.b.12 43.a.5.

7

Mijn Godt, bedroeft is mijn siele in my, daerom ghedencke ick aen dy,^* int lant aen de Iordane, ende Hermonim op den cleynen Berch.

* Iosu. 12.a.1.

8

⁺Dijne vloeden ruysschen daer henen, dat hier een diepte, ende daer een diepte bruyschen.^† Alle dijne waterwaghen ende baren gaen ouer my.

+ B vers 8

† Ione. 2.a.3.

9

De HEERE heeft des daechs toegheseyt zijne goetheyt: Ende des nachts singhe ick hem, ende bidde totten Godt mijns leuens.

10

Ick segghe tot Godt mijne steenroetse: Waerom hebdy mijns vergheten?^* Waerom moet ic so truerich gaen, wanneer mijn Viant my dringt?

* Psal. 43.a.2.

11

Het is als een moort in mijnen beenen, dat my mijne Vianden schenden, wanneer sy daghelijcx tot my segghen:^* Waer is nv dijn Godt?

* Psal. 79.b.10

12

^† Wat bedroeft ghy v mijn siele, ende zijt so onrustich in my? Wacht op God, want ick sal hem noch dancken, dat hy mijns aensichts hulpe, ende mijn Godt is.

† Psa. 42.a.6 43.a.5.