Den Bibel, Inhoudende dat Oude ende Nieuwe Testament (Biestkensbijbel)

¶ Den .xlj. Psalm.

1

Eenen Psalm Dauids, voor te singen

2

⁺VVel dien,^* die hem des nootdruftigen aenneemt, dien sal de HEERE verlossen ter quader tijt.

+ A vers 2

* Rom. 12.b.13. Eccles. 7.d.35. 12.a.8. Gallat. 6.b.10

3

De HEEre sal hem bewaren, ende byden leuen behouden. Ende hem laten welgaen op Aerden, ende niet gheuen in zijnder Vianden wille.

4

De HEEre sal hem verquicken op het bedde zijnder cranckheyt: Ghy helpt hem van alle zijnder crancheyt.

5

^* Ick sprack: HEERE zijt my ghenadich, heelt mijn siele:^† Want ic hebbe aen v ghesondicht.

* Eccle. 21.a.1.

† Psal. 51.a.6.

6

Mijn Vianden spreken quaet teghen my: Wanneer sal hy steruen, ende zijnen naem vergaen?

7

Sy comen, dat sy aenschouwen, ende en meynent doch niet van herten: Maer soecken wat, dat sy lasteren mogen, gaen henen, ende draghent wt.

8

⁺Alle die my haten^† mompelen te samen teghen my, ende dencken quaet ouer my.

+ B vers 8

† Luysteren.

9

Sy hebben een boeuen stuck ouer my besloten: Wanneer hy leyt, en sal hy niet weder opstaen.

10

^† Oock mijn vrient, dien ic my betroude, die mijn broot adt, treedt my onder de voeten.

† Ioan. 13.b.18. Dan. 11.d.26.

11

Maer ghy HEERE zijt my ghenadich: Ende helpt my op, so wil icse betalen.

12

Daer by mercke ick, dat ghy een welbehaghen aen my hebt, dat mijn Viant niet ouer my^† iuychende en wort.

† Triumpheert.

13

Maer my onthout ghy om mijnder vroomicheyt wille, Ende stelt my voor uwe aensicht eewelijck.

14

Gheloeft sy de HEERE de Godt Israels, van nv aen tot inder eewicheit. Amen, Amen.