Den Bibel, Inhoudende dat Oude ende Nieuwe Testament (Biestkensbijbel)

¶ Den .xl. Psalm.

1

Eenen Psalm Dauids, voor te singhen.

2

⁺ICk verbeydede des HEEren, ende hy neychde hem tot my, ende hoorde mijn crijsschen.

+ A vers 2

3

^* Ende trock my wt der grousamen Cuylen, ende wt den Modder. Ende settede mijn voeten op eenen steen, dat ick ghewisse treden can.

* Psal. 18.b.17.

4

Ende heeft my een nieuwe liet in mijnen mont gegeuen, te louen onsen Godt: Dat sullen vele sien, ende den HEEre vreesen, ende op hem hopen.

5

^* Wel dien, die zijn hope settet opten HEEre: Ende hem niet en keert totten hoouerdighen, ende die met lueghenen omgaen.

* Iere. 17.b.7. Psal. 2.b.12.

6

HEEre mijn Godt, groot zijn uwe wonderen, ende uwe ghedachten, die ghi aen ons bewijst. Dy en is niet ghelijck, ick wilse vercondighen, ende daer af segghen, hoe wel sy niet te vertellen en zijn.

7

^+* Offerhanden ende Spijsoffer en behagen v niet: Maer de ooren hebt ghy mi open gedaen. Ghy en wilt noch Brantoffer noch Sondoffer.

+ B vers 7

* Iere. 7.c.20. Heb. 10.a.5.

8

^† Doen sprack ick: Siet, ick come: Inden boeck is van my gheschreuen.

† Phili. 2.a.7

9

Vwen wille, mijn God, doe ic geerne:^† Ende uwe Wet heb ic in mijnder herten.

† Iere. 31.f.33.

10

^‡ Ick wil prediken de gerechticheyt inder grooter ghemeynte: Siet, ick en wil my mijnen mont niet laten stoppen, HEEre dat weet ghy.

‡ Psal. 22.c.23. 35.c.18.

11

^* Vwe gherechticheyt en verberghe ick niet in mijn herte, van dijner waerheyt ende van dijnen Heyl, spreke ick: Ick en verhele uwe goetheyt ende trouwe niet, inde groote ghemeynte.

* Matt. 12.d.35

12

Maer ghy HEEre, en wilt doch dijne barmherticheyt van my niet keeren: Laet uwe goedertierenheyt ende trouwe my alle weghen behoeden.

[p. 206v]

13

⁺Want my heeft omringt lijden sonder ghetal. Mijne sonden hebben my aenghegrepen, dat ick niet sien en can. Haerder is meer dan hayr op mijn Hooft: Ende mijn herte heeft my verlaten.

+ C vers 13

14

^† Laet het v wel beuallen HEEre, dat ghy my verlost. Haest v HEEre my te helpen.

† Psal. 70.a.1.

15

^* Schamen moeten sy haer, ende te scanden worden, die nae mijn siele staen, dat sy die^* ombrengen:^† Te rugghe moeten sy vallen, ende te schanden worden, die my quaet gunnen.

* Psal. 35.d.26. 70.a.3. 71.b.13

* Verdoen.

† Iob. 31.c.29. Prou. 17.a.5. Psal. 70.a.3.

16

Sy moeten haerder schande verschricken, die ouer my roepen: Daer, daer.

17

Het moeten haer verblijden ende vrolijck zijn, alle die nae v vraghen: Ende die dijn Heyl beminnen^† moeten seggen alle weghen: De HEEre sy hooghe gheloeft.

† Psal. 35.d.27. 70.a.8.

18

Want ick ben arm ende ellendich, maer de HEEre^† sorget voor my: Ghy zijt mijn helper ende verlosser. Mijn God, en vertoeft niet.

† 1.Pet. 5.b.7.