Den Bibel, Inhoudende dat Oude ende Nieuwe Testament (Biestkensbijbel)

¶ Den xxxix. Psalm.

1

Eenen Psalm Dauids, voor te singhen, voor Ieduthun.

2

⁺ICk hebbe voor my ghenomen, ick wil my hoeden,^* dat ick niet en sondighe met mijnder tonghen.

Ick wil mijnen mont toomen, dewijle ick den godloosen alsoo voor my sien moet.

+ A vers 2

* Iacob. 3.a.2.

3

Ick ben verstomt ende stille gheworden, ende swijghe der vruechden: Ende moet mijn leet in my eten.

4

Mijn herte is brandich geworden in mijnen Lijue, ende als ick daer aen ghedencke, worde ick ontsteken, Ick spreke met mijnder Tonghen.

5

^* Maer HEEre leert my doch, dat het een eynde met my hebben moet, ende dat mijn leuen een Teecken heeft, ende ic daer af moet.

* Psal. 90.b.12. 119.l.84.

6

^* Siet, mijne daghen zijn eenre hant breede by v, ende mijn leuen is als niet voor v: Hoe gants niet zijn alle menscen, die doch soo seker leuen. Sela.

* Iob. 7 a 6. 8.a.9. 14.a.5.

7

^* Sy gaen daer henen als een schaduwe, ende maken haer veel onnutte onruste:^† Sy vergaderen, ende en weten niet wiet crijghen sal.

* 1.Pa. 30.c.10.

† Eccl. 11.b.7. Luc. 12.b.20.

8

⁺Nv HEEre, wes sal ic my troosten? Ick hope op v.

+ B vers 8

9

Verlost my van alle mijnder sonde, ende en laet my niet den Sotten eenen spot worden.

10

Ick wil swijghen, ende mijnen mont niet open doen. Ghy sultet wel maken.

11

Keert uwe plaghe van my, want ick ben versmacht voor de straffe uwer hant.

12

Wanneer ghy eenen castijt om der sonden wille, soo wort zijn schoonheyt verteert als van Motten: Ach hoe gants niet zijn doch alle menschen? Sela.

13

Hoort mijn ghebet HEEre, ende verneemt mijn crijsschen, ende en swijcht niet ouer mijn tranen: Want ick ben beyde uwe^† Pilgrim, ende dijn Borgher,^* als alle mijns Vaders.

† 1.Pa. 30.c.15.

* Gen. 15.c.13.

14

Laet af van my, dat ic my verquicke, eer dat ick henen vare, ende niet meer hier en sy.