Den Bibel, Inhoudende dat Oude ende Nieuwe Testament (Biestkensbijbel)

¶ Den .xxxviij. Psalm.

1

Eenen Psalm Dauids totter gedachtenisse.

2

⁺HEEre,^† en straft my niet in uwen toorne: Ende en castijt my niet in uwe gramschap.

+ A vers 2

† Psal. 7.a.1. Iere. 10.d.24.

3

Want uwe pijlen steken in my, ende uwe hant druct my.

4

Daer en is niet ghesonts aen mijn lijf voor v dreygen: Ende daer en is geenen vrede in mijn gebeente voor mijn sonden.

5

Want mijn sonden gaen ouer mijn

[p. 206r]

hooft ghelijck eenen swaren last, zijn sy my te swaer gheworden.

6

Mijn wonden stincken, ende vloyen van etter, om mijnder dwaesheyt wille.

7

Ick gae crom ende seer ghebuct: Den heelen dach gae ick truerich.

8

Want mijn Lenden verdorren gantsch: Ende niet ghesonts en is aen mijn Lijf.

9

Het is met my gants anders geworden, ende ben seer in stucken ghestooten: Ick huyle van onrusten mijns herten.

10

⁺HEEre voor v is al mijn begheerte: Ende mijn suchten en is v niet verborgen.

+ B vers 10

11

Mijn Herte beeft, mijn cracht heeft my verlaten, ende dat licht mijnder oogen en is niet by my.

12

Mijn^* beminde ende vrienden staen teghen my, ende sien mijne plagen: Ende mijn naeste treden verre af.

* Iob. 19.b.14. Psal. 55.b.14 88.b.9.

13

Ende die my nader sielen staen, stellen my na: Ende die my quaet willen, spreken, hoe sy schande doen willen, ende gaen met enckel list om.

14

Maer ick moet zijn ghelijck een dooue, ende niet hooren: Ende ghelijck een stomme die zijnen mont niet open en doet.

15

Ende moet zijn ghelijck een die niet en hoort, ende die gheen wedersprake in zijnen mondt en heeft.

16

Maer ick volherde HEEre op v, ghy HEEre mijn Godt sult my verhooren.

17

⁺Want ick dencke, dat sy haer ymmer niet ouer my en verblijden: Wanneer mijnen voet slipperde, souden sy haer hooge roemen teghen my.

+ C vers 17

18

Want ick ben tot lijden ghemaect, ende mijn smerte is gestadelijck voor my.

19

Want ick doe mijne misdaet cont, ende sorge voor mijne sonde.

20

Maer mijne Vianden leuen, ende zijn machtich:^† Die my sonder schult haten, zijn groot.

† Psal. 69.a.5. 35.c.19.

21

^* Ende die my quaet doen voor dat goet, setten haer teghen my: Daerom dat ick ouer dat goede houde.

* Psal. 35.b.12 109.a.5.

22

En verlaet my niet HEEre mijn God: En weest niet verre van my.

23

Haest v snellijc my by te staen, HEEre, mijn Hulpe.