Den Bibel, Inhoudende dat Oude ende Nieuwe Testament (Biestkensbijbel)

¶ Den xxxvij. Psalm.

Eenen Psalm Dauids.

1

⁺EN^‡ vertorent v niet ouer de boose: En zijt niet nijdich ouer de quaetdoenders.

+ A vers 1

‡ Psal. 49.c.17

2

Want^† ghelijck dat gras, worden sy haest afghehouwen, ende als dat groene Cruyt sullen sy verwelcken.

† Psal. 90.a.5. 129.a.6. 4.Re. 19.e.25

3

Hoept op den HEEre,^* ende doet dat goede: Blijft inden Lande, ende gheneert v redelijck

* Deut. 4.a.1 5.d.31.

4

Hebt uwen lust aenden HEERE,^* die sal v geuen, wat dijn herte wenscht.

* Psal. 20.a.5.

5

^† Beueelt den HEEre, uwe wegen, ende hoept op hem, hy salt wel maken.

† Pro. 16.a.3.

6

^‡ Ende sal uwe gherechticheyt voort brenghen, ghelijck dat licht: Ende dijn recht als den middach.

‡ Esaie 58.b.8. Iob. 11.b.17.

7

^* Weest stille den HEEre, ende wacht op hem: Vertoornt v niet ouer dien, dien zijnen moetwille gheluckelijc voortgaet.

* Esai. 30.c.15. Psal. 46.b.11

8

Staet af van thoorne, ende laet de gramschap: En vertorent v niet, dat ghy oock quaet doet.

9

^+* Want de boose worden wtgeroyt: Maer die des HEEren verwachten, sullen dat Landt beeruen.

+ B vers 9

* Prou. 2.b.21. Iob. 18.b.17.

10

Het is noch om een cleyne tijt, soo en is de godloose niet meer.^† Ende als ghy na zijne stede sien sult, sal hy wech zijn.

† Iob. 7.b.21. Psal. 37.e.36.

11

^* Maer de ellendighe sullen dat Lant beeruen, ende lust hebben in grooten vrede.

* Matt. 5.a.5.

12

De godloose dreycht den gerechtigen^‡ ende bijt zijn tanden te samen ouer hem.

‡ Psa. 112.b.10

13

Maer de HEEre^† lacht zijns: Want hy siet dat zijnen dach coemt.

† Psal. 2.a.4. 59.b.9. Prou. 1.c.16.

14

De godloosen trecken dat sweert wt, ende spannen haren boghe, dat sy vellen den ellendighen ende Armen, ende slaen de vromen.

15

Maer haer sweert sal in haer herte gaen, ende haren boge sal in stucken breken.

16

^* Dat weynich, dat een rechtuaerdighe heeft, is beter, dan dat groote goedt veelder Godtloosen.

* Prou. 15.b.16 Eccle. 29.d.30. 1.Tim. 6.b.8.

17

^+† Want der godloosen Arm sal in stucken breken: Mer de HEEre onderhout de gherechtighe.

+ C vers 17

† Psal. 10.b.15

18

De HEEre kent de daghen der vromen, ende haer goet sal eewelijck blijuen.

19

Sy en worden niet te schanden inder boosen tijt: Ende inden dieren tijt sullen sy ghenoech hebben.

20

^* Want de godloose sullen vergaen, ende de vianden des HEEren: Al zijn sy al schoon als eenen costelijcken beemt,^* soo sullen sy doch vergaen ghelijck den roock vergaet.

* Psa. 92.b.10 Prou. 12.b.7.

* Psal. 68.a.3

21

De godloose borcht, ende en betaelt niet:^† Maer de gherechtighe is bermhertich ende milde.

† Psal. 112.a.4. Luc. 6.d.35.

22

Want zijn ghesegende beeruen dlant: Maer zijn veruloecte worden wtgeroyt.

23

⁺Vanden HEEre wordt sulcx mans ganck gheuordert: Ende heeft lust aen zijnen weghe.

+ D vers 23

24

^* Valt hy, soo en wort hy niet wech geworpen: Want de HEEre hout hem byder hant.

* Prou. 24.c.16 Psal. 34.c.20. 145.b.14.

25

Ick ben ionck gheweest, ende out geworden,^† ende en hebbe noch noyt ghesien, den rechuaerdigen verlaten, oft zijn saet om broot gaen.

† Eccle. 2.b.12. 3.Re. 17.a.4.

26

^‡ Hy is altijt barmhertich, ende leent gheerne, ende zijn saet wort gheseegent.

‡ Psal. 112.a.5. Prou. 11.c.24

27

^* Laet af vanden boosen ende doet dat goede ende blijft altoos eewelijck daer.

* Psa. 34.b.15 Amos. 5.b.15.

28

Want de HEEre heeft dat Recht lief,^† ende en verlaet zijn heyligen niet. Eewelijck worden sy bewaert: Maer der godloosen saet wort wtgheroyt.

† Hebr. 13.a.5. Iosue 1.a.5. Deut. 31.b.6.

29

De rechtuaerdige beeruen dlant, ende blijuen eewelijck daer in.

30

^† De mont des rechtuaerdigen spreect de wijsheyt, ende zijn tonge leert dat Recht.

† Prou. 31.d.26

31

^* De wet zijns Gods is in zijn herte, zijn voetstappen en slipperen niet.

* Esai. 51.b.7.

32

^† De godloose loert op den rechtuaerdighen, ende denct hem te dooden.

† Iere. 9.b.8. Psal. 10.b.9. Sap. 2.c.12.

33

Maer de HEEre en laet hem niet in zijn handen: Ende en verdoemt hem niet, wanneer hy veroordeelt wort.

34

⁺Wacht op den HEEre, ende hout zijnen wech, so sal hy v verhoogen, dat hy dat lant beerft. Ghy sult het sien, dat de godloose wtgheroyt worden.

+ E vers 34

35

^* Ick heb ghesien eenen godloosen, die was vermeten, ende breydde hem wt, ende groende ghelijck eenen Lauwerboom.

* Iob. 20.a.6.

36

^* Doenmen voor by ghinck, siet, doen was hy wech:^† Ic vraechde na hem, doen en wert hy nergent vonden.

* 1.Thess. 5.a.3.

† Iob. 7.b.21. Psal. 37.b.10.

37

Blijft vroom, ende hout v recht: Want sulcken salt ten laetsten wel gaen.

38

^* Maer de Ouertreders worden verdaen met malcanderen: Ende de godloosen worden ten laetsten wtgheroyt.

* Iob. 8.b.22.

39

Maer de HEEre helpt den rechtuaerdighen: die is haer stercheyt inder noot.

40

Ende de HEEre sal haer bystaen^† ende salse verlossen: Hy salse vanden godloosen verlossen, ende haer helpen, want sy betrouwen op hem.

† Iob. 36.b.15.