Den Bibel, Inhoudende dat Oude ende Nieuwe Testament (Biestkensbijbel)

¶ Den .xxxvj. Psalm.

Eenen Psalm Dauids des HEEren knechts, om voor te singhen.

1

⁺HEt is van gront mijns herten, van der godloosen wegen ghesproken: Dat gheen Godsvreese by haer en is.

+ A vers 1

2

Sy vercieren haer onder malcanderen selue: Dat si haer boose sake vorderen, ende andere verachten.

3

Alle haer leeringhe is schadelijck ende ghelogen:^† Sy en laten haer ooc niet wijsen, dat sy wat goets deden.

† Eccle. 21.b.10.

4

Maer sy dencken op haren Legher na schaden: Ende staen vast op den boosen wech, ende en schuwen gheen erch.

5

^* HEEre uwe goetheyt reyct so wijt als den Hemel is, ende uwe waerheyt so wijt als de wolcken gaen.

* Deu. 4.c.19. Mat. 5.e.45.

6

Vwe gherechticheyt staet ghelijck de berghen Gods ende uwe Recht, als groote diepten: HEERE,^* ghy helpt beyde den mensche ende vee.

* Esaie. 30.d.23

[p. 205v]

7

⁺Hoe dierbaer is uwe goetheyt, God, dat de menschen kinderen onder de schaduwe uwer vloghelen, betrouwen.

+ B vers 7

8

Sy worden droncken van de rijcke goeden ws huys, ende ghy drenctse met wellust, als met eenen stroom.

9

^† Want by v is de leuendige Fonteyne: Ende in uwen lichte sien wy dat licht.

† Ierem. 2.b.10 17.c.13. Ioan. 4.b.10

10

Breydt uwe goetheyt ouer de ghene die v kennen: Ende uwe gherechticheyt ouer de vroomen.

11

En laet my niet vanden stouten onder getreden worden: Ende de hant der godlooser en storte my niet.

12

Maer laet sy, de quaetdoenders, aldaer vallen, datse verstooten worden, ende niet blijuen en moghen.