Den Bibel, Inhoudende dat Oude ende Nieuwe Testament (Biestkensbijbel)

¶ Den .xxxv. Psalm.

Eenen Psalm Dauids.

1

⁺HEERE, kijft tegen mijne kijuers: Strijt tegen mijn wederstrijders.

+ A vers 1

2

Aengrijpt den schilt ende de wapen, ende maect v op, om my te helpen.

3

Trect voorwaerts de^‡ spere, ende beschut my tegen mijn veruolgers: Spreect tot mijnder sielen: Ick ben uwe hulpe.

‡ Spiesse.

4

Sy moeten haer schamen ende beschimt worden, die na mijn siele staen: Sy moeten te rugghe keeren, ende te schanden worden, die my quaet willen.

5

^† Sy moeten worden als Caf voor den wint: Ende de Engel des HEEren stootese wech.

† Psalm. 1.b.5. 83.b.14.

6

Haeren wech moete duyster ende slipperich worden: Ende de Engel des HEEren veruolchse.

7

^† Want sy hebben sonder oorsake ghestelt haer nette, om my te verderuen: Ende hebben sonder oorsake mijnder sielen kuylen gegrauen.

† Psal. 57.b.7. 140.a.6. 119.o 110. 141.b.9.

8

^+* Hy moet onuersiens oueruallen worden:^† Ende zijn Nette dat hy ghestelt heeft, moete hem vangen, ende moete daer inne oueruallen worden.

+ B vers 8

* Mat. 24.d.50

† Eccl. 28.a.2. Psal. 7.b.16. 9.c.16. 141.b.10. Prou. 26.c.27. Eccle. 10.a.4. 1.Hest. 7.b.10. Susan. g.62. Dani. 6.e.24.

9

Maer mijn siele moete haer verhueghen des HEEren, ende vrolijc zijn op zijne hulpe.

10

Alle mijn ghebeenten moeten seggen: HEERE, wie is v ghelijck? Ghy die den ellendigen verlost van dien die hem te sterck is: Ende den ellendighen ende armen van zijnen Roouers.

11

Daer treden aelweerdighe ghetuygen op,^† die tijgen my aen, des ick niet schuldich en ben.

† 2.Reg. 16.b.5.

12

^† Sy doen my quaet voor goet: Om my in hertsrouwe te brenghen.

† Psalm. 38.c.21 109.a.5.

13

Maer ick wanneer sy cranck waren, tooch eenen sack aen, dede my wee met vasten, ende badt van herten.

14

Ick hielt my, als oft mijn vrient ende Broeder ware: Ick ghinck truerich, als een die ouer zijn moeder rouwe draecht.

15

^† Maer sy verblijden haer ouer mijn schade, ende vergaderen haer: De hinc-kende vergaderen haer teghen my, sonder mijne schult: Sy scueren, ende en houden niet op.

† Prou. 17.a.5. Iob. 31.c.29.

16

⁺Met dien, die daer huychelen ende spotten om des buycks wille, byten sy haer tanden tsamen ouer my.

+ C vers 16

17

HEERE, hoe lange wildy toesien? Verlost doch mijn siele van haren bulderen: Ende mijne eensame vanden iongen Leeuwen.

18

^† Ick wil v dancken inder grooter gemeynte, ende onder veel volcx wil ick v roemen.

† Psal. 22.c.23. 40.b.10.

19

En laetse niet ouer my verblijden, die my^† onbillijck viant zijn: Noch metten ooghen spotten, die my^‡ sonder oorsake haten.

† Tonrecht.

‡ Psal. 25.c.19. 69.a.5. Ioan. 15.c.25.

20

Want sy dencken schade te doen, ende soecken valsche saken teghen de stille inden Lande.

21

^* Ende sperren haren mont wijt op tegen my, ende spreken: Daer, daer, dat sien wy gheerne.

* Psal. 22.b.14.

22

HEERE, ghy siet het, en swijcht niet HEERE: En weest niet verre van my.

23

Ontwect v, ende waect op tot mijnen rechte, ende tot mijnder sake, mijn Godt ende HEERE.

24

⁺HEEre mijn Godt, recht my na uwe gherechticheyt: Dat sy haer ouer my niet en verblijden.

+ D vers 24

25

En laetse niet segghen in haerder herten: Daer, daer, dat wilden wy. En laetse niet seggen: Wy hebben hem verslonden.

26

^* Sy moeten haer schamen ende te schanden worden^† alle die haer mijns quaets verblijden: Sy moeten met schande ende schaemte ghecleet worden, die haer tegen my beroemen.

* Psal. 40.c.15. 70.a.3. 71.b.13

† Pro. 17.a.5. Iob. 31.c.29.

27

Roemen ende verblijden moeten haer, die my ghunnen, dat ick recht behoude:^† Ende altoos segghen: De HEEre moet hooghe gheloeft zijn, die zijnen knecht wel wilt.

† Psal. 40.c.17. 70.a.5.

28

Ende mijn tonghe sal spreken van uwer gherechticheyt, ende v daghelijcx prijsen.