Den Bibel, Inhoudende dat Oude ende Nieuwe Testament (Biestkensbijbel)

¶ Den .xxxiij. Psalm.

1

⁺VErhuecht v^† des HEEren ghy rechtuaerdighe: De vrome sullen hem heerlijck prijsen.

+ A vers 1

† Psal. 32.b.12. 97.b.12.

2

^* Danct den HEEre met Herpen, ende lofsinghet hem op den Psalter van thien snaren.

* Ephe. 5.b.19. Col. 3.c.16.

3

^† Singet hem een nieuwe Liet: Maket goet op snaren spel met gheschal.

† Psal. 96.a.1. 98.a.1. Iudith. 16.a.2

4

^* Want des HEEren woort is warachtich ende wat hy toeseyt, dat hout hy ghewisselijck.

* Psalm. 119.m.89.

5

Hy bemint gherechticheyt, ende dat ghericht:^* De Aerde is vol goetheydt des HEEREN.

* Psalm. 119.h.64.

6

^† Den Hemel is door dat woort des HEEren ghemaect: Ende alle zijn heyr door den gheest zijns monts.

† Genes. 1.a.1. Col. 1.b.16. Iudi. 16.c.17.

7

^+* Hy hout dat water inder zee te samen, ghelijck in een lederen Flessche: Ende leyt de diepte int verborghen.

+ B vers 7

* Iob. 38.a.8. Gene. 1.a.9. Iere. 5.d.21. Iob. 26.b.10.

8

Alle Werelt vreese den HEEre, ende voor hem^‡ schouwe hem alle wat op den Aertbodem woont.

‡ Ontsye ofte schroeme.

9

^* Want so hy spreect, soo gheschiedet: Soo hy ghebiedet, soo staet het daer.

* Genes. 1.a.3. Iudit. 16.d.19

10

De HEEre maect te niete den^† raet der Heydenen, ende weyndet de ghedachten der Volcken.

† Esai. 8.a.2. 19.c.11. 30.a.1. Psalm. 1.a.1.

11

^† Maer den raet des HEEren blijft eewelijck, zijns herten ghedachten inder eewicheyt.

† Esa. 46.b.9

12

^* Wel den volcke, diens de HEEre een Godt is: Dat Volck dat hy tot een Erue vercoren heeft.

* Psalm. 144.c.15.

13

^† De HEEre schout vanden Hemel, ende siet aller menschen kinderen.

† Prou. 15.a.3. Iob. 28.c.25. 2.Par. 16.b.9 2.Mac. 9.a.5. 12.d.22. Eccle. 23.d.27.

14

Van sinen vasten Throon siet hy op alle, die op Aerden woonen.

15

^* Hy stiert hen alle dat herte:^† Hy merct op alle haer wercken.

* Prou. 16.a.2.

† Eccle. 15.c.23

16

⁺Eenen Coninck en helpt zijn groote macht niet: Eenen Ruese en wordt niet verlost door sine groote cracht.

+ C vers 16

17

^† Paerden en helpen oock niet, ende haer groote stercte en verlost niet.

† Prou. 21.d.31.

18

^* Siet, des HEEren ooghe siet op de gene die hem vresen, die op sine goetheyt hopen.

* Eccle. 15.c.24 34.c.19. Hebre. 4.c.13. Psal. 34.b.16 1.Pet. 3.b.12.

19

Dat hy haer siele verlosse vander doot, ende voedese inden dieren tijt.

20

Onse siele wacht op den HEEre:^† Hy is onse hulpe ende Schilt.

† Psal. 115.a.9

21

Want onse herte verhuecht hem zijns: Ende wy betrouwen op sinen heyligen Naem.

22

Vwe goetheyt HEEre sy ouer ons, ghelijck als wy op v hopen.