Den Bibel, Inhoudende dat Oude ende Nieuwe Testament (Biestkensbijbel)

[p. 204v]

¶ Den .xxxij. Psalm.

Een onderwijsinghe Dauids.

1

⁺VVel dien,^† dien de ouertredingen vergheuen zijn: Dien de sonde bedect is.

+ A vers 1

† Rom. 4.a.7.

2

Wel den mensche, die de HEEre de misdaet niet toe en rekent: In wiens gheest gheen valsheyt en is.

3

Wan doen ick het woude verswijghen, versmachten mijn ghebeenten, door mijn daghelijcx huylen.

4

Wany uwe hant was dach ende nacht swaer op my, dat mijn sap verdroochde, gelijct inden Somer dorre wort. Sela.

5

Daerom bekenne ic v mijn sonden, ende en verhele mijne misdaet niet.^† Ic sprac: Ick wil den HEEre mijn ouertredinge bekennen: Doen vergaeft ghy my de misdaet mijnder sonden. Sela.

† Iob. 13.b.15. Luc. 15.c.21. Esai. 65.d.23. Psal. 51.a.5.

6

^* Daeromme sullen v alle Heylighen bidden, ter rechter tijt: Daerom wanneer groote watervloeden comen, en sullen sy niet aenden seluen gheraken.

* Pro. 18.b.10

7

⁺Ghy zijt mijn Beschermer, wilt ghy my doch voor ancxt behoeden, op dat ic verlost, geheel vrolijc roemen conde. Sela.

+ B vers 7

8

^† Ick wil v onderwijsen, ende v den wech leeren dien ghy wandelen sult: Ick wil v met mijnen ooghen leyden.

† Prouer. 2. 3.

9

Sijt niet als^† Paerden ende Muylen, die niet verstandich en zijn, welcke men Toom ende gebidt inden mont leggen moet, wanneer sy niet tot v en willen.

† Tob. 6.d.14. Prou. 26.a.3.

10

De godloose heeft veel plagen: Maer wie op den HEEre hopet, dien sal de goetheyt omuanghen.

11

^* Verhuecht v des HEEren, ende zijt vrolijck ghy rechtuaerdighe: Ende roemet alle ghy vrome.

* Psalm. 33.a.1. 97.b.12.