Den Bibel, Inhoudende dat Oude ende Nieuwe Testament (Biestkensbijbel)

¶ Den .xxxj. Psalm.

1

Eenen Psalm Dauids voor te singen.

2

⁺HEEre,^† op v betrouwe ick, en laet my nemmermeer te schanden worden: Verlost my door uwe gherechticheyt.

+ A vers 2

† Psalm. 7.a.1. 25.a.1. 71.a.1. Eccle. 2.b.12.

3

Neycht v ooren tot my, haestelijck helpt my, zijt my eenen stercken steen, ende een Borcht, dat ghy my helpt.

4

Want ghy zijt mijnen steen ende mijn borcht, ende om ws Naems wille, wilt my doch leyden ende voeren.

5

^† Wilt ghi my doch wt den nette trecken, dat si my gestelt hebben: Want ghy zijt mijn stercte.

† 1.Reg. 19.a.2. 23.b.7.e.24.

6

^* In uwen handen beuele ick mijnen gheest: Ghy hebt my verlost HEERE, ghy ghetrouwe Godt.

* Luc. 23.e.46. Act. 7.f.59.

7

Ick hate, die daer houden op loose leeringhe: Maer ick hope op den HEEre.

8

Ick verhueghe my, ende ben vrolijck ouer uwe goetheyt: Dat ghy mijn ellende aensiet, ende bekent mijn siele inder noot.

9

^+* Ende en ouergeeft my niet in de handen des viants: Ghy stelt mijn voeten op wijde ruymte.

+ B vers 9

* 1.Reg. 23.e.26

10

HEEre zijt mijns genadich, want my is ancxt: Mijn gedaente is veruallen van trueren, daer toe mijn siele ende mijnen buyc.

11

Want mijn leuen heeft afghenomen van droeffenisse, ende mijnen tijt van suchten: Mijn cracht is veruallen door mijn misdaet, ende mijn beenen zijn versmacht.

12

Het gaet my so qualijc,^† dat ic een grote versmaetheyt geworden ben mijnen gebueren, ende een scouwinge mijnen magen: Die my sien opter straten, vlieden voor my.

† Ps. 44.b.14 79.a.4. Iere. 20.b.7.

13

Mijns is vergheten inder herten als een doode: Ick ben gheworden als een ghebroken vat.

14

⁺Want vele schelden my qualijck, dat een yeghelijck hem van my schout:^† Sy raetslagen met malcanderen ouer my, ende dencken my dat leuen te nemen.

+ C vers 14

† 2.Reg. 17.a.1.

15

^* Maer ick HEEre hope op v, ende segghe: Ghy zijt mijn Godt.

* Psalm. 25.a.2

16

^† Mijnen tijt staet in uwe handen: Verlost my van de hant mijnder vianden, ende van dien, die my veruolghen.

† Iob. 14.a.5.

17

Laet uwe aensicht lichten ouer uwen knecht: Helpt my door uwe goetheyt.

18

^* HEEre en laet my niet te scanden worden, want ick roepe v aen: De godloose moeten te schanden verstommet worden inder Hellen.

* Psal. 25.a.2.

19

Verstommen moeten de valsche monden, die daer spreken tegen den rechtuaerdighen stijf, stout ende schimpich.

20

Hoe groot is uwe goetheyt, die ghy verborghen hebt den ghenen die v vreesen, ende vertoontse den ghenen die voor den lieden op v betrouwen.

21

⁺Ghy verberchtse heymelijc by v, voor yeghelijcx hoomoet: Ghy bedecktse inder Hutten, voor de kijuende tonghen.

+ D vers 21

22

Ghelouet sy de HEEre, dat hy my een wonderlike goetheyt bewesen heeft, in een vaste Stadt.

23

Want ick sprac in mijnder versaechtheyt: Ick ben van uwen oogen verstooten: Maer noch hoorde ghy mijns smeekens stemme, doen ick tot v riep.

24

Bemint den HEEre alle sine heylighen: De gheloouigen behoet de HEEre, ende verghelt rijckelijck den ghenen die hoomoet oeffent.

25

^* Sijt getroost ende onuersaecht, alle ghy die des HEEren verbeyt.

* Psal. 27.c.14.