Den Bibel, Inhoudende dat Oude ende Nieuwe Testament (Biestkensbijbel)

¶ Den .xxx. Psalm.

1

Eenen Psalm te singhen vander inwijdinghe des huys Dauids.

2

⁺ICk prijse v HEEre, want ghy hebt my verhoocht,^* ende en laet mijn vianden hen niet ouer my verhueghen.

+ A vers 2

* Psal. 25.a.2.

3

HEERE mijn God, doen ick tot v riep, maecte ghy my ghesont.

4

^‡ HEEre, ghy hebt mijn siele wt der Hellen gheuoert,^† ghy hebt my leuendich behouden, daer die inder Hellen varen.

‡ 1.Reg. 2.b.6.

† Psal. 86.b.13

5

Ghy heyligen, lofsinget den HEEre, danct ende prijst sine heylicheyt.

6

^† Want sinen toorne duert een oogenblick, ende heeft lust totten leuen: Den auont lanck duert dat weenen, maer des morghens de vruechde.

† Esa. 54.b.7. 2.Cor. 4.b.17 Mich. 7.c.18.

7

⁺Maer ick sprack, doent my wel ginck: Ic en sal nemmermeer daer neder liggen.

+ B vers 7

8

Want HEERE, door v welbehagen hebdy mijnen berch sterck gemaect: Maer doen ghy v aensicht verberchde, verschricte ick.

9

Ick wil HEERE roepen tot v, den HEEre wil ick smeecken.

10

^† Wat isser nut aen mijnen bloede, wanneer ic doot ben? Sal v ooc het stof dancken, ende uwe trouwe vercondighen?

† Psa. 6.a.6. 88 b.12. 115.b.17. Esaie. 38.d.18

11

HEEre hoort, ende zijt my genadich: HEEre zijt mijn helper.

12

Ghy hebt my mijn plaghe verandert in eenen Rey: Ghy hebt mijnen sac wtgetoghen, ende my met vruechden ghegort.

13

Op dat v lofsinghe mijn eere ende niet stille en worde: HEEre mijn Godt ick wil v dancken inder eewicheyt.