Den Bibel, Inhoudende dat Oude ende Nieuwe Testament (Biestkensbijbel)

¶ Den .xxviij. Psalm.

Eenen Psalm Dauids.

1

⁺VVanneer ick roepe tot v, HEEre mijn Sterckte, soo en swijcht my niet: Op dat niet, indien ghy swijcht, ick ghelijck en worde den ghenen die inder hellen varen.

+ A vers 1

2

Hoort de stemme mijns smeekens, wanneer ick tot v crijssche: wanneer ick mijn handen op heffe tot uwen heyligen Choor.

3

En trect my niet henen onder den godloosen ende onder de quaetdoenders,^* die vriendelijck spreken met haren naesten, ende hebben dat boose int herte.

* Iere. 9.a.8.

4

^* Gheeft hen nae haerder daet, ende nae haren boosen wesen: Gheeft hen nae de wercken haerder handen, betaelt hen, wat sy verdient hebben.

* Iob. 34.b.11. Iere. 17.b.10. Roma. 2.a.6. Psal. 62.b.13.

5

⁺Want si en willen niet achten op dat doen des HEEren, noch op de wercken zijnder handen: Daerom sal hyse in stucken breken, ende niet bouwen.

+ B vers 5

6

Gelooft sy de HEEre: Want hy heeft verhoort de stemme mijns smeeckens.

7

^* De HEEre is mijne stercte, ende mijnen schilt: Op hem hopet mijn herte, ende my is gheholpen. Ende mijn herte is vrolijc, ende ic wil hem dancken met mijn liet.

* Deut. 8.d.18.

8

De HEEre is haer sterckte, hy is de stercte, die sinen ghesalfden helpt.

9

Helpt v volck.^† ende seghent v erue, ende weytse ende verhoochtse eewelijck.

† Deut. 32.b.9.