Den Bibel, Inhoudende dat Oude ende Nieuwe Testament (Biestkensbijbel)

¶ Den .xxvij. Psalm.

Eenen Psalm Dauids.

1

⁺DE HEEre is mijn licht ende mijn Heyl, voor^† wien soude ic my vreesen.^* De HEEre is mijns leuens cracht, voor wien soude my grouwelen?

+ A vers 1

† Psal. 112.b.7.

* Abac. 4.c.19

2

Daeromme, so de boose, mijn wedersegghers ende vianden aen my willen, om mijn vleesch te vereten, moeten si aen loopen ende vallen.

3

^* Oft hem alschoon een heyr teghen my leyde, soo en sal hem doch mijn herte niet vreesen: Oft daer eenen Crijch tegen my verhief, soo verlate ick my op hem.

* Psal. 3.a.7. 118.a.10. Eccle. 34.c.16

4

^* Eenderley bidde ic vanden HEEre, dat hadde ick gheerne:^† Dat ick int huys des HEEren blijuen mochte mijn leefdaghe, om te aenschouwen den schoonen Godts dienst des HEEren, ende sinen tempel te besoecken.

* Luce. 10.d.42

† Psal. 23.a.6.

5

^+* Want hy bedect my in zijnder hutten ter booser tijt: Hy verbercht my hey-melijck in zijnder tenten,^† ende verhoocht my op een roetse.

+ B vers 5

* 1.Reg. 21.a.1.

† 1.Re. 23.e.24.

6

Ende sal nv verhooghen mijn hooft, ouer mijn vianden, die rontom my zijn: Soo wil ick in zijnder hutten lof offeren. Ick wil singhen ende lof seggen den HEERE.

7

HEERE hoort mijn stemme als ic roepe: Sijt mi genadich, ende verhoort my.

8

Mijn herte hout v voor uwe woort, ghy sout mijn aensicht soecken: Daerom soecke ick oock HEEre uwe aensichte.

9

En verbercht v aensicht niet voor my, ende en verstoot niet inden toorne uwen knecht: Want ghy zijn mijn hulpe: En verlaet my niet, ende en trect de hant niet van my af, Godt mijn Heyl.

10

⁺Want mijn vader ende mijn moeder verlaten my: Maer de HEEre neemt my op.

+ C vers 10

11

^* HEEre wijst my uwen wech, ende leyt my op de rechte bane, om mijnder vianden wille.

* Psal. 25.a.4.

12

En gheeft my niet inden wille mijnder vianden: Want valsche ghetuyghen staen teghen my, ende doen my onrecht sonder^† schouwen.

† Ophouden.

13

Maer ick ghelooue doch, dat ick sien sal, dat goet des HEEren, in dat Lant der leuendighen.

14

^* Verbeyt des HEEren, zijt getroost ende onuersaecht, ende verbeyt des HEEren.

* Psal. 31.d.25.