Den Bibel, Inhoudende dat Oude ende Nieuwe Testament (Biestkensbijbel)

¶ Den .xxv. Psalm.

Eenen Psalm Dauids.

1

⁺NAe v HEERE verlangt my.

+ A vers 1

2

Mijn Godt,^* ick hope op v, en laet my niet te schanden worden:^† Op dat haer mijn vianden niet en verhueghen ouer my.

* Psalm. 31.a.1. 71.a.1.

† Psal. 13.a.5. 30.a.2.

3

^‡ Want niemant en wort te scanden, die ws verwacht: Maer te schanden moeten si worden, de loose verachters.

‡ Esa. 49.e.23 Rom. 9.d.33. Psalm. 31.a.1.

4

^* HEEre wijst my uwe weghen, ende leert my uwe paden.

* Psal. 27.c.11. 86.b.11.

5

Leyt my in uwe waerheyt, ende leert my: Want ghy zijt de God die my helpt, daghelijcx verwachte ick ws.

6

Ghedenct HEEre aen uwe bermherticheyt, ende aen uwe goetheyt, die vander werelt aen gheweest is.

7

^* En ghedenct niet de sonden mijnder iuecht, ende mijnder ouertredinghe: Maer gedenct mijns nae uwer bermherticheyt, om uwer goetheyt wille.

* Iob. 13.c.26.

8

⁺De HEEre is goet ende vroom: Daerom onderwijst hy de sondaren opten wege.

+ B vers 8

9

Hy leyt de ellendighe recht, ende leert den ellendighen sinen wech.

10

De weghen des HEEren zijn enckel goetheyt ende waerheyt, den genen die zijn verbont ende ghetuyghenissen houden.

11

^* Om ws Naems wille HEEre, zijt genadich mijnder misdaet, die daer groot is.

* Esa. 43.d.35.

12

Wie is die, die den HEEre vreest? Hy sal hem onderwijsen den besten wech.

13

Sijn siele sal in goeden woonen, ende zijn saet sal dat Lant besitten.

14

De heymelijckheydt des HEEren is

[p. 203v]

onder dien, die hem vreesen:^† Ende zijn verbont laet hy haer weten.

† Iere. 31.f.33.

15

Mijn ooghen sien ghestadelijc tot den HEEre: Want hy sal mijnen voet wt het net trecken.

16

⁺Keert v tot mi, ende zijt mijns genadich: Want ick ben eensaem ende ellendich.

+ C vers 16

17

Den ancxt mijns herten is groot: Voert my wt mijnen nooden.

18

Siet aen mijn iammer ende ellende: Ende vergheeft my alle mijne sonden.

19

^* Siet aen dat mijnder vianden soo vele is, ende^† haten my wt vermetenheyt.

* Psalm. 3.a.1.

† Ioan. 15.c.25

20

Bewaert mijn siele, ende verlost my: En laet my niet te schanden worden:^† Want ick betrouwe op v.

† Psalm. 7.a.1.

21

Slecht ende Recht, dat behoede my, want ick verwachte ws.

22

God verlosse Israel, wt alle zijnder noot.