Den Bibel, Inhoudende dat Oude ende Nieuwe Testament (Biestkensbijbel)

¶ Den .xxiiij. Psalm.

Eenen Psalm Dauids.

1

⁺DE^† Aerde is des HEEren, ende wat daer in is: Den Aertbodem, ende wat daer op woont.

+ A vers 1

† Exod. 19.a.5. 1.Regum. 2.b.8. 1.Cor. 10.c.26. Deut. 10.c.14 Iere. 27.a.5.

2

^* Want hy heeft hem aen de zee ghefundeert, ende aen de wateren bereyt.

* Iob. 38.a.6. Psal. 136.a.6.

3

^† Wie sal op des HEEren berch gaen? Ende wie sal in sine heylige Stede staen?

† Psal. 15.a.1. Esai. 33.b.14.

4

Die ontsculdige handen heeft,^‡ ende reyn van herten is, die niet lust en heeft tot looser leere, ende en^† sweert niet valschelijck.

‡ Psal. 73.a.1. Mat. 5.a.8.

† Exo. 20.b.7.

5

Die sal de segeninghe vanden HEEre ontfanghen, ende gherechticheyt vanden Godt zijns Heyls.

6

⁺Dat is dat geslachte dat na hem vraecht, dat daer soect v aensicht Iacob. Sela.

+ B vers 6

7

Maect de dueren wijt, ende de poorten in de werelt hooghe, dat de Coninck der eeren intrecke.

8

Wie is de selue Coninc der eeren? Het is de HEEre, sterck ende machtich: De HEEre machtich inden strijt.

9

Maect de dueren wijt, ende de poorten in de werelt hooghe, dat de Coninck der eeren intrecke.

10

Wie is de selue Coninck der eeren? Het is de HEEre Sebaoth: Hy is de Coninck der eeren. Sela.