Den Bibel, Inhoudende dat Oude ende Nieuwe Testament (Biestkensbijbel)

¶ Den .xviij. Psalm.

1

Eenen Psalm voor te singhen Dauids, des HEEREN knechts: De welcke heeft den HEEre de woorden deses liets ghesproken, ter tijt doen hem de HEEre verlost hadde van zijnder Vianden hant, ende van Sauls hant, ende sprack.

2

⁺HErtelijck lief heb ic v HEERE, mijn sterckte,

+ A vers 2

3

^* HEEre mijnen steen, mijn Borch, mijn verlosser, mijn Godt, mijn troost,^† op welcken ick betrouwe.

Mijnen scilt, ende hoorne mijns Heyls, ende mijn beschudder.

* Psal. 91.a.2. 144.1.2.

† Hebre. 2.c.15

4

^* Ick wil den HEERE louen ende aenroepen, so worde ick van mijnen Vianden verlost.

* 2.Reg. 22.a.4

5

^* Want des doots banden omuingen my, ende de beken Belials verschricten my.

* Psal. 115.a.3.

6

Der Hellen banden omuingen my, ende des doots stricken ouerweldichden my.

[p. 202r]

7

^* Wanneer my ancxt is, so roepe ick den HEEre aen, ende crijssce tot mijnen God, soo verhoort hy mijn stemme van sinen Tempel, ende mijn roepen coemt voor hem tot sinen ooren.

* Tren. 3.e.55. Ionas. 2.a.2. Psalm. 3.a.5. 118.a.5. 120.a.1

8

De^* Aerde beefde, ende wert beweecht, ende de fundamenten der Bergen roerden haer, ende beefden, doen hy toornich was.

* Mat. 27.f.51. 2.Reg. 22.b.8. 4.esd. 16.a.12 Iudit. 16.c.18.

9

Damp ghinck op van sinen Nuese, ende verteerende vier van sinen mont, dat het daer af blicxemde.

10

Hy neychde den Hemel, ende voer daer af, ende donckerheydt was onder zijn Voeten.

11

⁺Ende hy voer op den Cherub, ende vlooch daer henen:^† Hy sweefde op de Vloghelen des wints.

+ B vers 11

† Psal. 104.a.3.

12

Sijn^* Tente rontom hem was duysternisse, ende swarte dicke wolcken, daer was hy in verborghen.

* Psal. 97.a.2.

13

Vanden glants voor hem, deylden haer de Wolcken, met Haeghel ende Blicxem.

14

Ende de HEEre^† donderde inden Hemel, ende de Hoochste liet wt zijnen donder,^* met Haghel ende Blicxem.

† 1.Reg. 7.c.10.

* Exod. 9.e.23.

15

^† Hy schoot sine stralen, ende verstroydese: Hy liet seer Blicxemen, ende verschrictese.

† Aba. 4.a.4 Dan. 7.b.10.

16

Daer sachmen watergoten, ende des Aertbodems gront wert ontdect, HEEre van uwen schelden, vanden Aseme ende snuyuen uwer Nuesen.

17

^* Hy schickte wt vander Hoochten, ende haelde my,^† ende tooch my wt groote wateren.

* Psal. 57.a.4.

† Psal. 40.a.3

18

Hy verloste my van mijnen stercken Vianden, van mijnen Haters, die my te machtich waren.

19

Die my ouerweldichden ter tijt mijns ongheuals:^* Ende de HEERE werdt mijn toeuerlaet.

* Psalm. 91.b.9 Eccle. 34.c.16

20

Ende hy voerde my wt in dat ruyme: Hy ructer my wt, want hi hadde lust tot my.

21

⁺De HEERE doet wel aen my, nae mijn gherechticheyt: Hy vergheldet my nae de reynicheyt mijnder handen.

+ C vers 21

22

Want ic houde de wegen des HEEren, ende en ben niet Godloos tegen mijnen Godt.

23

Want alle sine Rechten hebbe ic voor ooghen, ende zijn ghebot en worpe ick niet van my.

24

Maer ic ben sonder smette voor hem, ende beware my voor sonde.

25

^* Daerom vergeldet my de HEEre nae mijne gherechticheyt, nae der reynicheyt mijnder handen voor sinen oogen.

* Iob. 33.c.27.

26

^* Byden heyligen sydy heylich, ende byden vroomen sydy vroom:

* 2.Re. 22.d.26.

27

Ende byden reynen sydy reyne, ende byden verkeerden sydy verkeert.

28

Want ghy helpt het ellendige volck,^* ende de hooghe ooghen vernederdy.

* 1.Pet. 5.a.5. Prou. 6.b.17. Esaie. 2.b.11.

29

Want hy verlicht mijne Licht: De HEEre mijn God maect mijne duysternisse Licht.

30

Want met v can ick Crijschvolck in stucken smijten:^† Ende met mijnen God ouer de mueren springhen.

† Phili. 4.b.13.

31

Gods wegen zijn sonder smette.^† De reden des HEEren zijn doorloutert: Hy is eenen schilt allen den ghenen die hem betrouwen.

† Ps. 12.a.7. 19.b.9. 119.s.140 Prou. 30.a.5.

32

Want^† waer isser een Godt, sonder alleen de HEEre? Oft een Sterckte behaluen onse Godt.

† Deut. 4.f.35. 32.f.39.

33

^+* Godt rust my toe met cracht, ende maect mijn weghen sonder smette.

+ D vers 33

* Abac. 4.c.19.

34

Hy maeckt mijn voeten ghelijck den Herten, ende settet my op mijn Hoochte.

35

Hy^* leert mijn hant strijden, ende leert mijnen Arm eenen stalen boge spannen.

* Psal. 14.a.1. 2.Reg. 22.d.35.

36

Ende geeft my den schilt dijns Heyls, ende uwe rechte hant sterckt my: Ende wanneer ghy my verootmoedicht, soo maeckt ghy my groot.

37

Ghy maket onder my ruymte te gaen, dat mijn Enckelen niet en slipperen.

38

Ick wil mijne Vianden naeiaghen, ende aengrijpense: Ende niet om keeren, tot dat ickse te niet ghebracht hebbe.

39

Ick wilse in stucken smijten, ende sy en sullen mi niet wederstaen: Sy moeten onder mijn voeten vallen.

40

Ghy condt my toerusten met sterckte totten strijt: Ghy contse onder my worpen, die haer teghen my setten.

41

Ghy gheeft my mijne Vianden inde vlucht, dat ick mijne Haters verstoore.

42

^* Sy roepen, maer daer en is gheen Helper, tot den HEEre, maer hy en antwoort hen niet.

* Prou. 1.c.28. Iob. 27.a.9.

43

⁺Ick wilse in stucken stooten, als stof voor den wint: Ick salse wech ruymen, ghelijck dat slijck op de straten.

+ E vers 43

44

Ghy helpt my vanden twistigen volcke, ende maeckt my een Hooft onder de Heydenen: Een volc dat ick niet en kende, dient my.

45

Het hoort my met ghehoorsamen ooren: Maer de vreemde kinderen verlochenen my.

46

De vreemde kinderen versmachten, ende grabbelen in haer banden.

47

De HEERE leeft, ende ghelooft sy mijn Stercte: Ende de Godt mijns Heyls moet verheuen worden.

48

De Godt die my wrake gheeft, ende dwingt de Volcken onder my.

49

Die my verlost van mijnen Vianden, ende verhooghet my wt den ghenen die haer tegen my setten: Ghy helpt my vanden vermetelen.

50

^* Daerom wil ick v dancken HEEre onder de Heydenen, ende uwen Naem Lof singhen.

* Roma. 15.a.9

51

^† Die sinen Coninck groot^* Heyl bewijst, ende wel doet sinen gesalfden, Dauid, ende sinen sade eewelijck.

† 2.Reg. 22.f.51.

* Victorie.