Den Bibel, Inhoudende dat Oude ende Nieuwe Testament (Biestkensbijbel)

¶ Den .xvij. Psalm.

Een ghebet Dauids.

1

⁺HEEre^† verhoort de gerechticheyt, merckt op mijn roepen, verneemt mijn ghebet, dat niet wt valschen monde en gaet.

+ A vers 1

† Psal. 26.a.1.

2

Spreeckt ghy in mijnder saken, ende siet ghy op het recht.

3

^* Ghy proeft mijn herte, ende besoecket des nachts: Ende reynicht my, ende en vint niet: Ick heb my voorghenomen, dat mijnen mont niet en sal ouertreden.

* Prou. 17.a.3. Psal. 7.b.10.

4

Ick beware my int woort uwer lippen, voor menschen werck, op den wech des Moorders.

5

Behout mijnen ghanck op uwe voetpaden, dat mijn voetstappen niet en slipperen.

6

Ick roepe tot v, dat ghy Godt my verhooren wilt: Neycht uwe ooren tot my, hoort mijne reden.

7

Bewijst uwe wonderlijcke goedertierenheyt, ghy Heylant der gheender die v betrouwen: Teghen de ghene die haer teghen uwe rechter hant setten.

8

^+† Behoet my ghelijck eenen ooghen appel in de ooghe.^* Beschermt my onder de schaduwe uwer Vloghelen.

+ B vers 8

† Sach. 2.b.8.

* Psal. 63.b.8 Mat. 23.d.37. 4.Esd. 1.c.30.

9

Voor de godloosen die my verstooren, voor mijn Vianden die rontom na mijne siele staen.

10

Haer vette houden tsamen: Sy spreken stoutelijck met haren mont.

11

Waer wy gaen, so omringhen si ons: Haer ooghen rechten si daer henen, dat si ons ter Aerden storten.

12

Ghelijck als eenen Leeu, die den roof begheert, ghelijck eenen Iongen Leeu die inde Cuylen sidt.

13

HEERE maect v op, ouerweldicht hem, ende vernedert hem: Verlost mijn siele vanden godloosen^† met uwen sweerde.

† Ephe. 6.b.17. Apoca. 19.b.15

14

Vanden Lieden uwer hant, HEEre van de Lieden deser werelt,^* welcke haer deel hebben in haer leuen, den welcken ghy den buyck vult met uwen schat, die daer kinderen^* de volheyt hebben, ende laten haer ouerschot haren Ionghen.

* Sapi. 2.b.9.

* Planteyt.

15

Maer ick wil schouwen v aensicht in gherechticheyt, ic wil sadt worden, wanneer ick ontwake nae uwen Beelde.