Den Bibel, Inhoudende dat Oude ende Nieuwe Testament (Biestkensbijbel)

¶ Den .xvj. Psalm.

1

Een gulden Cleynoot Dauids.

2

⁺BEwaert my God, want ick betrouwe op v.

+ A vers 2

3

Ick hebbe gheseyt totten HEEre: Ghy zijt iae de HEEre: Ick moet om uwent wille lijden.

4

Voor de heyligen, die op Aerden zijn, ende voor de heerlijcke, aenden seluen hebbe ick alle mijn welbehaghen.

5

Maer de ghene die eenen anderen nae loopen, sullen groot herten leet hebben: Ic en wil van haren Dranckoffer met den bloede niet offeren, noch hare Namen in mijnen mont voeren.

6

Maer de HEEre is^† mijn goet ende mijn deel: Ghy onderhout mijn erfdeel.

† Thren. 3.c.24 Psal. 73.c.26. 119.h.37.

7

Dat Lot is my gheuallen opt lieffelijcste: My is een scoon erfdeel geworden.

8

⁺Ick loue den HEEre die my gheraden heeft: Oock castijen my mijn nieren des nachts.

+ B vers 8

9

^† Ick heb den HEEre altijt voor ooghen:^* Want hy is my ter rechter hant. Daerom sal ick wel blijuen.

† Actu. 2.c.25.

* Prou. 3.c.25. Psal. 109.d.31

10

Daerom verhuecht hem mijn herte, ende mijn eere is vrolijck: Oock sal mijn vleesch seker ligghen.

11

^† Want ghy en sult mijn siele niet inde Helle laten, ende niet toelaten, dat uwe heylighe verrotte.

† Actu. 2.d.31. 13.e.35.

12

Ghy doet my condt den wech tot den leuen: Voor v is vruechde de volheydt, ende lieffelijck wesen tot uwer rechter hant eewelijck.