Den Bibel, Inhoudende dat Oude ende Nieuwe Testament (Biestkensbijbel)

¶ Den .v. Psalm.

1

Eenen Psalm Dauids, voor te singhen, voor dat Erue.

2

⁺HEEre hoort mijn woorden, merct op mijne redene.

+ A vers 2

3

Hebt acht op mijn roepen, mijn Coninck ende mijn Godt, want ick wil voor v bidden.

4

HEEre, vroech wilt mijne stemme hooren, vroech wil ick my tot v schicken, ende daer op mercken.

5

^† Want ghy en zijt niet een Godt, dien godloos wesen behaecht: Wie boos is, die en blijft niet voor v.

† Sapi. 14.b.9 Prou. 3.d.31.

6

De grootsprekers en bestaen niet voor uwen ooghen, ghy zijt Viant allen^† misdadighen.

† quaetdoenders

7

Ghy verdoet de^* lueghenaers. De HEERE heeft eenen grouwel aenden bloetghierighen, ende valschen.

* Psal. 101.b.7.

8

^† Maer ick wil in v huys gaen, op uwe groote goedertierenheyt, ende aenbeden teghen uwen heylighen Tempel, in uwer vreesen.

† Psal. 138.a.2.

9

HEEre leydt my in uwe gherechticheyt, om mijnder Vianden wille. Rechtet uwen wech voor my henen.

10

⁺Want in haren mont en is niet sekers: Haer inwendicheyt is hertenleet:^† Haer kele is een open graf: Met haren tongen^† huychelen si.

+ B vers 10

† Roma. 3.b.13.

† Veynsen.

11

Beschuldichtse Godt, dat si vallen van haren voornemen: Stootse wt om haerder grooter ouertredinghe wille. Want si zijn v onghehoorsaem.

12

Laetse hen verblijden, alle die op v betrouwen, eewelijck laetse roemen. Want ghy beschermtse, laet vrolijc zijn in v, alle die uwen Naem liefhebben.

13

Want ghy HEEre^† segent de rechtuaerdighe, Ghy croontse met ghenaden, als met eenen schilde.

† Psal. 115.b.4.