Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

1

⁺COnt ghy der Leeuwinnen haren roof te iaghen ghegheuen, ende de ionghe Leeuwen versaden?

+ A vers 1

2

Dat si in haer plaetse neder liggen, ende rusten in dat holle, daer si loeren?

3

Wie^† bereyt den rauen de spijse, als zijn ionghen tot Gode roepen, ende^* dolende vlieghen, als sy niet teten en hebben?

† Psal. 147.b.9

* Herwaerts ende derwaerts.

4

Weet ghy den tijt, wanneer de^† Gemsen opten steenen baren?

† Steenbocken.

5

Oft hebt ghi ghemerckt, wanneer de Hinden groot gaen? Hebt ghy getelt haer maenden, als si vol worden, oft weet ghy den tijt wanneer si baren?

6

Sy buyghen hen, als sy baren, ende schueren van malcanderen, ende laten hare ionghen wt.

7

Hare ionghen worden vet, ende wassen int coren, ende gaen wt, ende en comen niet weder tot hen.

8

Wie heeft dat Wildt soo vry laten gaen? Wie heeft de banden des Wildts ontlost?

9

Dien ick dat velt tot eenen huyse ghegheuen hebbe, ende de woestijne tot eender wooninghen.

10

Het belacht dat rumoer der Stadt, dat poffen des drijuers en hooret niet.

11

⁺Het siet na de berghen, daer zijn weyde is, ende soeckt waer het groene is.

+ B vers 11

12

Meynt ghy, dat een^† Eenhoren v sal dienen, ende sal aen v cribbe blijuen?

† Num. 23.d.23. 24.b.8. Psal. 22.c.22.

13

Cont ghy hem dat iock aenknoopen om de voren te maken, dat hy achter v ploeghe inde^† valleyen?

† Leechten, dalen.

14

Muecht ghy v op hem verlaten, dat hy soo sterck is? Sult ghy hem v laten arbeyden?

15

Muecht ghy hem betrouwen, dat hy v uwe saet weder brenghe, ende in uwe schuere vergadere?

16

De vederen der Pauwen zijn schoonder, dan de vlueghelen ende vederen des Oyuaers,

17

Die zijn eyeren opter Aerden laet, ende laetse op de heete Aerde wtbroeden.

18

Hy verghetet datse vertreden mochten worden, ende datse een Wildt dier brake.

19

Hy wordt soo hert teghen zijn ionghen, recht als oft sy zijn niet en waren. Hy en acht dies niet, dat hy te vergheefs arbeydt.

20

⁺Want God heeft hem de wijsheyt ghenomen, ende en heeft hem gheen verstant ghegheuen.

+ C vers 20

21

Inder tijt, als hy hooch vliecht, verhoocht hy hem, ende belacht beyde Peert ende Man.

22

Cont ghy den Paerde cracht gheuen, oft sinen hals ghecieren met sinen briesschen?

23

Cont ghijt veruaren ghelijc de sprinchanen? Dat is prijs zijnder nuesen, wat veruaerlijck is.

24

Het crabbet opter Aerden, ende is vrijmoedich met crachte, ende treckt wt den gheharnasten te ghemoet.

25

Het bespottet die vreese, ende en verschrict niet, ende en vlucht niet voor tsweert,

26

Al ist dat al schoon den coker teghen hem clinct, ende beyde de^† spere ende schilt blict.

† Lancie.

27

Het beeft ende grimmet, ende scherret inder Aerden, ende en acht niet der trompetten gheluyt.

28

Als de trompette seer clinct, soo spreket: Huy, ende riect den strijdt van verre, dat crijsschen der Vorsten ende iuyghen.

[p. 199r]

29

⁺Vliecht den Hauick door uwe verstant, ende breydet zijn vlueghelen totten Suyden?

+ D vers 29

30

Vliecht den Arent so hooch wt uwen beuele, dat hy sinen nest inder hoochten maect?

31

In den steenen woont hy, ende blijft op de steenclippen, aen de steenen ende in vaste plaetsen.

32

Van daer siet hy na de spijse, ende zijn oogen sien verre.

33

Sijn ionghen suypen bloet,^† ende waer een aes is, daer is hy.

† Mat. 24.c.28 Luce. 17.f.36.

34

Ende de HEEre antwoorde Hiob, ende sprac:

35

Wie metten Almachtigen twisten wilt, en salt hem die niet bybrengen? Ende wie Godt straffet, en sal die niet antwoorden?

36

Hiob antwoorde den HEEre, ende sprack: Siet, ick ben te lichtuaerdich gheweest, wat sal ick antwoorden?^† Ick wil mijn hant op mijnen mont legghen.

† Mich. 7.c.16.

37

Ick hebbe eens ghesproken, daerom en wil ick niet meer antwoorden. Anderwerf en wil icx niet meer doen.