Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ Hier wort Godt inghebracht sprekende wt den tempeeste, teghen Iob hem straffende, om dat hy te veel ongherechts ende stouticheyts van zijnder voorsichticheyt ghesproken heeft, Oft (als sommighe meynen) tegen Elihu tot Iobs bescherminge. Ende in dese iiij. Capittelen verhaelt hy de macht, voorsichticheyt ende wijsheyt Gods.

1

⁺ENde de HEEre antwoorde Hiob, wt eenen onweder, ende seyde:

+ A vers 1

2

Wie is die, die alsoo faelgeert inder wijsheyt, ende spreect alsoo met onuerstande?$

3

^† Gordet uwe lendenen als een man: Ick wil v vraghen, Leert my.

† Iob. 40.a.1.

4

Waer waert ghy,^* doen ick de Aerde fundeerde? Segghet my, zijt ghy soo cloeck.

* Gene. 1.a.1. Psal. 146.a.6

5

Weet ghy, wie haer de mate gheset heeft? Oft wie daer een recht snoer ouer getrocken heeft?

6

^† Oft waer op staen haer voeten ghesoncken? Oft wie heeft haer eenen hoecsteen geleyt?

† Psal. 24.a.2. 136.a.6.

7

Doen my de morgen Sterren te samen loofden, ende alle kinderen Gods iuychten.

8

^* Wie heeft de zee met haeren dueren besloten, doense daer wt brack, ghelijck wt moeders lichaem?

* Iere. 5.d.21. Iob. 26.b.10. 28.c.26. Prou. 8.c.29.

9

Doen icse met wolcken cleedede, ende in donckerheydt inwondt als in windeldoecken.

10

^+† Doen ic haer den loop brack met mijnen damme, ende

+ B vers 10

† Psal. 33.b.7. 104.b.9. Luce. 8.c.24.

[p. 198v]

stelde haer grendelen ende dueren, ende sprack.

11

Tot hier toe sult ghy comen, ende niet voorder. Hier sullen hen neder legghen uw stoute^* baren.

* Goluen.

12

Hebt ghy by uwer tijt den morghen gheboden, ende den dageraet haer plaetse gewesen?

13

Dat de hoecken der Aerden gheuaet, ende de godloose wt gheschuddet souden worden.

14

Den segel sal hem verwandelen als leem, ende si staen als een cleet.

15

^† Ende den godloosen sal haer licht genomen worden, ende den arm der hoouaerdigher sal ghebroken worden.

† Iob. 18.a.5. 21.b.17. Prou. 13.a.9. 24.c.20.

16

Sijt ghy inden gronde der zee ghecomen, ende hebt ghy inde voetstappen der diepten ghewandelt?

17

Hebben haer v des doots poorten oyt open gedaen? Oft hebdy ghesien de poorten der duysternissen?

18

Hebt ghy vernomen, hoe breedt de Aerde sy? Segt op, weet ghy sulcx altemael?

19

Welck is den wech, daer dat licht woont, ende welck is de plaetse der duysternisse?

20

Dat ghy sine palen mocht af nemen, ende mercken den padt tot zijnen huyse?

21

⁺Wist ghy, dat ghy op die tijt gheboren sout worden? Ende hoe veel uwer daghen zijn souden?

+ C vers 21

22

Sijt ghy geweest, van daer den sneeu coemt? Oft hebt ghy ghesien,^* van waer den haghel coemt?

* Exod. 9.e.23. Iosue. 10.c.11.

23

Die ick hebbe bewaert totten tijt der droeffenissen toe, ende totten daghe des strijdts, ende orloochs toe.

24

Door welcken wech deylet hem dat licht? Ende op vaert den Oosten wint opter Aerden?

25

Wie heeft den slachreghen sinen loop wt ghedeylt? Ende den wech den blixem ende donder?

26

Dat het reghent op dat Lant, daer niemandt en is, inder woestijnen daer gheen mensche en is.

27

Dat hy de woestijnen ende wildernissen veruullet, ende maeckt, dat dat gras wasset.

28

Wie is des regens vader? Wie heeft de druppelen des daus ghegenereert?

29

Wt wiens lijf is dat ijsch ghegaen? Ende wie heeft den rijm onder den Hemel ghewonnen:

30

Dat dat water verborghen wordt als onder steenen, ende de diepte bouen beuriest?

31

Cont ghy de banden der seuen sterren te samen ghebinden? Oft den bandt des Orion ontbinden?

32

Cont ghy die morghen Sterre voortbrenghen, tot haerder tijt? Oft den wagen aenden Hemel ouer sine kinderen voeren?

33

Weet ghy hoe den Hemel te regeren is? Oft condt ghy hem meesteren opter Aerden?

34

⁺Cont ghy uwen donder inde wolcken hooch op gheuoeren? Oft sal v de menichte des waters bedecken?

+ D vers 34

35

Cont ghy de blixemen wt laten, dat si henen varen, ende seggen: Hier zijn wy?$

36

Wie gheeft de wijsheyt int^† verborghen? Wie gheeft verstandighe ghedachten?

† Herte.

37

Wie is soo wijs, die de wolcken tellen coste? Wie can de watersluysen aenden Hemel ghestoppen?

38

Als dat stof begoten wort, dat het te hoope loopt, ende de cluyten aen malcanderen cleuen.