Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Een bewijs dat God niemandt en straft, ten sy dat hijt verdient.

1

⁺ELihu sprack voort segghende:

+ A vers 1

2

Verbeyt my noch een luttel. Ick wilt v te kennen gheuen. Want ick heb noch van Gods weghen wat te segghen.

3

Ick wil mijn verstant verre halen, ende mijnen Schepper bewijsen, dat hy gherecht sy.

4

Mijne reden en sullen sonder twijfel niet valsch zijn: Mijn verstant sal sonder vlecken zijn voor v.

5

Siet, Godt en verwerpt die machtighe niet, want hy is oock machtich van crachte des herten.

6

Den godloosen en behout hy niet, maer hy helpt den ellendighen totten rechte.

7

^† Hy en keert sine ooghen niet af vanden gerechten,^* ende de Coningen laet hy altoos opten troon sitten, dat si hooch blijuen.

† Psal. 34.b.16

* 2.Reg. 7.c.12 4.Reg. 9.b.6

8

^† Ende waer gheuanghene in stocken liggen, ende ghebonden met stricken allendelijck,

† 2.Pa. 33.c.11.

9

So vercondicht hy hen, wat si ghedaen hebben, ende hare onduecht, dat si met ghewelt om ghegaen hebben.

10

Ende opent hen dat oor totter castijende onderwijsinghe ende seytet hen: Dat sy hen vanden onrechte souden bekeeren.

11

^+† Sijn sy hem ghehoorsaem, ende dienen hem, soo sullen si in goeden daghen out worden, ende met lust leuen.

+ B vers 11

† Esaie. 1.c.19.

12

^† En hooren si niet, soo sullen sy int

† Exod. 14.f.27

[p. 198r]

sweert vallen, ende vergaen eer zijt ghewaer worden.

13

Als de gramschap de hypocrijten raect, soo en schreyen si niet:

14

Als si gheuanghen ligghen, so sal daer haer siele met quale steruen, ende hare leuen onder de hoereerders.

15

^† Maer den allendighen sal hy wt zijnder allenden verlossen, ende den armen dat oor openen inder droeffenisse.$

† Psal. 34.c.23. 37.e.40.

16

Hy sal v rucken wt de wijde kaken des angsts, die geenen gront en heeft. Ende v tafel sal ruste hebben vol alles goets.$

17

Maer ghy maect de sake der godlooser goet, dat haer sake ende recht behouden wort.

18

Siet toe, dat v niet misscien toornicheydt beweecht en hebbe om yemanden te plaghen:

19

Oft groote gheschencken v niet ghebuycht en hebben.

20

Meynt ghy, dat hy v gewelt acht, oft gout, oft eenighe stercte, oft vermoghen?

21

⁺Ghy en derft den nacht niet begheeren, om de Lieden te oueruallen in haer plaetse.

+ C vers 21

22

Wacht v, ende en keert v niet totten onrechte, ghelijck ghy dan van allendicheyt begost hebt.

23

Siet, Godt is te hooch in zijnder cracht. Waer is een Leeraer, ghelijck hy is?

24

Wie wil sinen wech ouer hem besoecken? Ende wie wil tot hem segghen: Ghy doet onrecht?

25

Ghedenct, dat ghy zijn werck niet en weet, ghelijc de lieden singhen.

26

Want alle menschen sien dat: De lieden sient van verre.

27

Siet, God is groot ende onbekent. Niemant en can tghetal zijnder Iaren ondersoecken.

28

^† Hy maeckt dat water tot cleynen druppelen, ende drijft zijn wolcken te samen tot regen,

† Psal. 147.b.8 3.Re. 18.e.45. Deut. 11.b.13. 28.b.12.

29

⁺Dat de wolcken vloeyen ende druypen seer op de menschen.

+ D vers 29

30

Als hy voorneemt de wolcken wt te breyden, ghelijck zijn hooghe Tente:

31

Siet, soo breyt hy sinen blicxsem wt, ouer die selue, ende bedeckt alle eynden der zee.

32

Want daer mede verscrict hy de Lieden, ende gheeft doch spijse planteyt.

33

Hy bedect den blicxsem als met handen, ende ghebiet hem, dat hy weder come.

34

Daer af ghetuycht zijn gheselle, namelijck, des Donders toornicheydt inde wolcken.