Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

¶ Hy straft Iob om dat hy hem voor oprecht ende ontschuldich wt gheeft.

1

⁺ENde Elihu antwoorde, ende sprack:

+ A vers 1

2

Houdt ghy dat voor recht, dat ghy spreect: Ick ben gherechter dan God?

3

Want ghy segt: Wie ghelt yet by v? Wat helpet oft ick my sonder sonde make?

4

Ick wil v antwoorden een woort, ende uwen vrienden met v.

5

Merckt ten Hemel ende siet toe, ende aensiet de wolcken, dat si v te hooch zijn.

6

Sondicht ghy, wat cont ghy met hem maken? Ende of uwer misdaet vele is, wat cont ghy hem ghedoen?

7

^* Ende oft ghy gherecht zijt, wat cont ghy hem ghegheuen? Oft wat sal hy van uwen handen nemen?

* Psal. 40.b.7. Hebre. 10.a.5.

8

Eenen mensche ghelijck als ghy zijt, mach uwe boosheydt wel yet doen, ende eenen menscen kinde uwe gerechticheyt.

9

⁺Die selue moghen crijsschen als hen vele gewelts geschiet, ende roepen ouer den arme der grooter,

+ B vers 9

10

Die niet daer na en vraghen, waer is Godt mijn Schepper?

11

Die den sanck maect inder nacht, die ons gheleerder maect dan dat vee opter Aerden, ende wijser dan de vogelen onder den Hemel.

12

Mer si sullen daer ooc roepen ouer den hoomoet der boosen, ende hy en salse niet verhooren.

13

Want God en sal de ydelheyt niet verhooren, ende de Almachtighe en salt niet aensien.

14

Maer ghy segt: Ghy en sult hem niet sien. Mer daer is een oordeel voor hem, alleen verwacht zijns.

15

Oft zijn toornicheyt soo haest niet en besoect, ende hem dies so gheringe niet aen en neemt, datter soo vele lasteren zijn.

16

Daerom heeft Hiob sinen mont te vergheefs op ghedaen, ende geeft stoute verantwoordinghe wt met onuerstande.