Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Een bewijs van sulcker meyninge, maer niemandt en meyne, dat hy wil besluyten, dat de boose alleen gestraft worden, want dat selue heeft Iob genoech bewesen valsch te zijn.

1

⁺ENde Elihu antwoorde, ende sprac:

+ A vers 1

2

Ghy wijsen hoort mijne redene, ende ghy verstandighe merckt op my.

3

^* Want dat oore proeft die redene, ende die mont smaect de spijse.

* Iob. 12.b.11.

4

Laet^† ons een oordeel verkiesen, dat wy bekennen onder ons, wat goet sy.

† 1.cor. 14.d.29.

5

Want Hiob heeft gheseyt:^† Ick ben gherecht, ende Godt weyghert my mijn recht.

† Iob. 13.b.18. 16.c.17. 33.a.9

6

Ick moet lieghen, hoe wel ick recht hebbe. Ende ben ghequelt van mijne pijlen, hoe wel ict niet met sculde verdient en hebbe.

7

Wie is een sulcke als Hiob? Die daer spotterie drinct als water:

8

Ende opten wech gaet metten misdadighen, ende wandelt metten godloosen lieden?

9

Want hy heeft gheseyt: Al ist dat yemant alschoon vroom is, soo en ghelt hy doch niet by Gode.

10

⁺Daerom hoort nae my toe, ghy wijse lieden. Dat sy verre, dat Godt godtloos soude zijn, ende de Almachtighe onrechtuaerdich.

+ B vers 10

11

^† Maer hy vergheldet den mensche, daer nae dat hy verdient heeft,

† Psal. 28.a.4 62.b.13. Iere. 25.b.14. Roma. 2.a.6. Apoca. 2.e.23.

[p. 197v]

ende raect elcken na sinen doene.

12

Sonder twijfel,^* God en verdoemt niemant met onrecht: Ende de Almachtige en buyghet dat rechte niet.

* Rom. 3.a.4.

13

Wie heeft dat, dat opter Aerden is geordineert? Ende wie heeft den gheheelen Aertbodem gheset?

14

Waert dat hy hem dies onderwinden woude, soo soude hy alle gheest ende adem tot hem vergaderen.

15

Alle dat vleesch soude tsamen vergaen,^* ende die mensche soude weder tot asschen worden.

* Psa. 146.a.4

16

Hebt ghy nv verstant, so hoort dat, ende merckt op de stemme mijnder redenen.

17

Soude een daer omme dat recht dwinghen, dat hijt hatet? Ende dat ghy stout zijt, sout ghy daerom den gerechten verdoemen?

18

Soude een totten Coninc segghen: Ghy loose Man? Ende totten Vorsten: Ghy godloose?

19

⁺Die^† doch niet aen en siet den persone der Vorsten, ende en kennet den heerlijcken niet meer dan den armen.

+ C vers 19

† Deut. 10.d.17. 2.Par. 19.b.7 Sap. 6.b.8. Roma. 2.b.11. Eccle. 35.b.22. Act. 10.e.34. Galat. 2.b.6.

20

Want si zijn altemael zijnder handen werck. Haestelijcken moeten die lieden steruen, ende ter middernacht verscricken ende vergaen.

21

Die machtige worden crachteloos wech genomen.

22

Want^† sine oogen sien op eens yegelijcken wegen, ende hy siet alle haer ganghen.

† Iob. 31.a.4. Prouer. 5.c.21 Psal. 33.b.13.

23

Daer en is gheen duysternisse noch donckerheyt, dat hen de^* misdadighe daer mochten verbergen.

* Quaetdoenders.

24

Want^‡ het en wort niemanden^† gestadet, dat hy teghen Godt rechte.

‡ Rom. 9.c.20.

† Toegelaten.

25

^* Hy verdoet der stouten vele die niet te tellen en zijn, ende stelt sommige andere in haer plaetse:

* Dani. 2.c.21.

26

Om^† dat hy haer wercken kent, ende keertse snachts omme, dat si verslaghen worden.

† Dani. 5.f.30.

27

Hy werpt de godloose ouer eenen hoope, daerment gheerne siet:

28

⁺Daeromme, dat si van hem gheweken zijn, ende en verstonden geen van sine weghen.

+ D vers 28

29

Dat dat crijsschen der armer voor hem moeste comen, ende hy dat crijsscen der ellendiger hoorde.

30

Als hy vrede gheeft,^* wie wil verdoemen? Ende als hy dat aensicht verbercht, wie wil hem sien, onder de volcken ende Lieden?

* Roma. 8.f.34. Esaie. 50.b.8.

31

Ende laet ouer hen regeren eenen Huychelaer, om dat volck te^† dringhen.

† Benauwen.

32

Ick moet voor God spreken, ende en cant niet ghelaten.

33

En heb icx niet geraect, soo leert ghy my dat beter. Hebbe ic onrecht gehandelt, ic en wils niet meer doen.

34

Men verwacht die antwoort van v. Want ghy verwerpet alle dinck, ende ghy hebbet begost, ende ic niet. Weet ghy nv wat, so segget op.

35

Wijse lieden laet ick my seggen, ende eenen wijsen man hoort my.

36

Maer Hiob spreect met onuerstande, ende sine woorden en zijn niet cloeck.

37

Mijne vader, latet Hiob gheproeft worden, totten eynde toe, daerom dat hy hem tot onrechten lieden keert.

38

Hy heeft bouen zijn sonden daer toe noch ghelastert: Daerom, laet hem tusschen ons gheslaghen worden, ende daer nae veel teghen Gode met zijnen woorden strijden.$