Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ De gene die dit aenhangsel gemaect hadde, meynt dat Godt de menschen straft om haerder sonden ende misdaet, maer als si hem ootmoedelijc bidden, soo verhoort hyse.

1

⁺HOort doch Hiob mijne reden, ende merct op alle mijne woorden.

+ A vers 1

2

Siet, ic doe mijnen mont open, ende mijn tonghe spreket in mijnen monde.

3

^* Mijn herte sal recht spreken, ende mijne lippen sullen dat reyne verstant segghen.

* Prou. 8.a.7.

4

Den gheest Godts heeft my ghemaect,^† ende den adem des Almachtighen heeft my dat leuen ghegheuen.

† Gene. 2.b.7.

5

Cont ghy, soo antwoort my: Schickt v teghen my, ende settet v hier.

6

Siet, ick ben Gods, effen so wel als ghy.^* Ende van leem ben ick ooc ghemaect,

* Gene. 2.b.7.

7

Nochtans ghy en derft voor my niet verscricken, ende mijn handt en sal v niet te swaer zijn.

8

Ghy hebt ghesproken voor mijnen ooren, ick moeste de stemme uwer reden hooren.

9

^† Ick ben reyn ende sonder misdaet, onschuldich, ende en heb gheen sonde.

† Iob. 11.a.4. 16.b.17. 34.a.5.

10

Siet, hy heeft een sake teghen my gheuonden, daerom hout hy my voor sinen viant.

11

Hy^† heeft mijne voeten inden stock gheset, ende heeft alle mijne weghen bewaert.

† Iob. 13.c.27.

12

Siet, effen daer wt, besluyte ick teghen v, dat ghy niet rechtuaerdich en zijt, want Godt is meerder dan een mensch.

13

^+* Waerom wilt ghy teghen hem twisten, dat hy v gheen rekenschap en gheeft, van alle sinen doen?

+ B vers 13

* Rom. 9.c.20.

14

Want als God eenmael yet besluyt: Soo en bedenct hijt niet eerst daer nae.

15

^† Inden droome des ghesichts inder nacht, als den slaep op de lieden valt, als si opt bedde slapen,

† Ge. 20.a.3. 28.c.12. 31.d.24. Dan. 2.a.1. Math. 2.b.12.

16

Dan opent hy dat oore der lieden, ende veruaertse ende onderwijstse,

17

Dat hy den mensche van zijn voornemen soude keeren, ende beschermen hem voor hoouaerdie.

18

Ende verschoont sine siele voor de verderuinghe, ende zijns leuens, dat het niet int sweert en valle.

19

Hy straft hem met smerte op zijn bedde, ende alle sine ghebeente strenghelijck.

20

Ende recht hem zijn leuen also toe, dat hem voor de spijse grouwelt, ende zijn siele, datse gheenen lust en heeft te eten.

21

Sijn vleesch verdwijnt, dat hy niet wel sien en mach, ende zijne beenen worden in stucken gheslaghen, datmense niet gheerne aen en siet.

22

Dat zijn siele totten verderuen genaket, ende zijn leuen totten dooden.

23

⁺Waert dat dan een Enghel, een van duysenden, met hem spraec, om den mensche te vercondighen, hoe hy soude recht doen,

+ C vers 23

24

So sal hy hem ghenadich zijn, ende seggen: Hy sal verlost worden, dat hy niet onderwaerts en vare in de verderuinghe. Want ick heb een versoeninghe geuonden.

25

^† Sijn vleesch groene weder als inder iuecht, ende laet hem weder ionck worden.

† Psal. 103.a.5.

26

Hy sal Gode bidden, die sal hem ghenade bewijsen, ende sal sine aensichte laten sien met vruechden,$

27

^† Ende sal den mensche nae zijnder gherechticheyt vergelden. Hi sal voor de lieden bekennen ende segghen: Ick wilde ghesondicht ende dat recht verkeert hebben:

† Psal. 18.c.25.

28

Maer het en hadde my niet nut geweest. Hy heeft mijn siele verlost, datse niet in verderuinghe en soude varen, maer dat mijn leuen, dat licht sien soude.

29

Siet, alle dat doet God drie oft viermael met elcken, dat hy zijn siele wederom soude halen wt der verderuinghe, ende verlicht hem met den lichte der leuender.

30

Aenmerckt Hiob, ende hoort toe nae my, ende swijcht dat ick spreke.

31

Maer hebt ghy wat te segghen, soo antwoort my. Segghet op:

32

Sijt ghy rechtuaerdich, ick wilt gheerne hooren.

33

Maer en hebt ghy niet, soo hoort toe nae my, ende swijcht, ick wil v wijsheyt leeren.