Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Hy beclaecht dat hy vanden onwetenden ende slechten veracht is.

1

⁺MAer nv belachen my die ionger zijn dan ick, der welcker vaders ick veracht had, te stellen onder mijn schaeps honden,

+ A vers 1

2

Der welcker vermoghen ick voor niet hielt, die tot den ouderdom niet ghecomen en conden.

3

Die van hongher ende commer eenlijck inder woestijnen vloden, nieuwelijck verdoruen ende allendich gheworden.

4

Die daer netelen wt plucten rontsom de bosschen, ende Ieneuer wortel was haer spijse.

5

Ende als sy die wttrocken, iuychten sy daer ouer als een dief.

6

Aende grouwelijcke beken woonden sy, in de holen der aerden

7

Ende steenreten, tusschen de bosschen riepen si, ende onder de dijstelen vergaderden sy:

8

De kinder der looser ende verachter Lieden, die de snootste inden Lande waren.

9

^† Nv ben ick haer^* snarenspel geworden, ende moet haer fabelken zijn.

† Psal. 69.b.13. Tren. 3.f.63. Ezech. 33.f.32.

* Liedeken oft smaetwort.

10

Sy hebben eenen grouwel aen my, ende maken hen verre van my, ende en sparen niet voor mijn aensicht wt te spijen.

11

Sy hebben mijne zeelen wt ghespannen, ende my te niete gemaect, ende dat mijne afghetoomet.

12

⁺Ter rechter sijden daer ick groende, hebben sy hen teghen my geset, ende hebben mijnen voet wt ghe-stooten,

+ B vers 12

13

Ende hebben ouer my eenen wech ghemaect om my te verderuen. Sy hebben mijn paden ghebroken.

14

Het was hen soo licht my schade aen te doen, dat sy geen hulpe daer toe en behoefden.

15

Sy zijn hier in ghecomen, ghelijck als door een wijde schuere, ende zijn sonder ordinancie herwaerts gheuallen.

16

Verschrickinge heeft hem teghen my gekeert, ende heeft mijne heerlijckheyt veruolcht ghelijc den wint, ende ghelijc een loopende wolcke mijnen geluckigen staet.

17

Maer nv giet haer mijne siele wt ouer my, ende den allendighen tijt heeft my ghegrepen.

18

Snachts worden mijn ghebeenten ouer al doorboort, ende die my iaghen, en gaen niet slapen.

19

Door de menichfuldicheyt der cracht worde ic anders ende anders ghecleet, ende men gordet my daer mede, als met den hooftslop mijns rocx.$

20

Men heeft my inden dreck ghetreden, ende ghelijc gheacht den stof ende asschen.

21

^† Roepe ick tot v, so en antwoort ghy my niet: Trede ick voort, soo en acht ghy op my niet.

† Matt. 15.c.23. Tren. 3.a.8.

22

Ghy zijt my verandert in eenen grouwelijcken, ende bewijst uwen haet aen my, metter stercten uwer hant.$

23

Ghy heft my op, ende laet my opten wint varen, ende versmeltet my crachtelijck.

24

⁺Want^† ick wetet dat ghy my den doot sult ouer leueren, daer is dat ghesette huys alder leuender.

+ C vers 24

† Hebr. 9.f.27.

25

Nochtans en sal hy de hant niet wtstrecken int beenhuys, ende zij en sullen niet crijschen van zijnen verderuen.

26

Ick weende ymmer inder herder tijt, ende mijnder siele iammerde der armer.

27

Ick verwachte dat goet, ende nv coemt dat boose:^† Ick hoepte opt licht, ende nv coemt de duysternisse.

† Esa. 59.b.9.

28

Mijn inghewanden sieden, ende en houden niet op: Den allendigen tijt heeft my oueruallen.

29

Ick gae swert daer henen, ende my en bernt nochtans gheen sonne.

30

Ick stae op inder ghemeynten ende crijsche.

31

Ick ben een broeder der Slanghen, ende een gheselle der Struysen.

32

Mijn huyt ouer my is swert gheworden, ende mijn ghebeenten zijn verdorret van hitte.

33

Mijne Herpe is een claghe gheworden, ende mijne^‡ pijpen, een weenen.

‡ Fluyten.