Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Een beschrijuinghe ende bewijsinghe des voorsichticheyts ende wijsheyt Godes.

1

⁺DAt siluer heeft zijn ganghen, ende dat gout zijne plaetsse daerment smelt.

+ A vers 1

2

^† Dat ijser brengtmen wter Aerden, ende wten steenen smeltmen metael.$

† Deut. 8.b.9.

3

Der duysternissen wort ymmer eenmael een eynde, ende yemant vint ymmer ten laetsten den^* Scheuersteen diep verborghen.

* Schalie.

4

Een sulcke beke sprinct daer wt, dat de ghene, die daer rontom woonen, den wech aldaer verliesen: Ende valt weder, ende schiet daer henen vanden lieden.

5

Men brengt oock vier onder wt der Aerden, daer nochtans bouen spijse op wast.

6

Men vint Saphir op sommige plaetsen, ende Aerden clompen daer gout is.

7

Den pat en heeft geen voghel bekent, ende gheens ghiers ooghe ghesien.

8

Die stoute kinderen en hebben daer niet op ghetreden,

9

Ende daer en is gheenen Leew opghegaen.

10

Oock slaetmen de hant aen de^* keyen, ende graeft de berghen om.

* Steenen.

11

Men trect beken wt den steenroetse, ende al wat costelijc is, siet dat ooghe.

12

Men keert den stroom des waters, ende brengt dat daer verborghen in is, aent licht.

13

^+† Maer waer wiltmen wijsheyt vinden? Ende waer is de plaetse des verstants?

+ B vers 13

† Prou. 2.a.6. Eccle. 1.a.1. Iacob. 1.a.5.

14

Niemant en weet waerse leyt, ende en wort inden Lande der leuender niet geuonden.

15

Den afgront seyt: Sy en is in my niet. Ende de See seyt: Sy en is by mi niet.

16

^† Men en cander geen gout om gheuen, noch siluer ouer geweghen om te betalen.

† Sap. 7.b.9.

17

Haer en is niet ghelijck Ophirisch gout, oft costelijcke Onich ende Saphir.

18

Gout ende Diamanten can haer niet gelijc zijn, noch om haer gulden cleynodien verwisselen.

19

Ramoth en Gabis en achtmen niet.^† De wijsheyt is hoogher te achten dan peerlen.

† Prou. 8.b.11. Psal. 19.b.11. Prou. 3.b.15. 16.c.16.

20

Topasius wt Morenlant en wort haer niet ghelijc gheschat, ende dat alderreynste gout en ghelt haer niet ghelijck.

21

⁺Van waer coemt dan de wijsheyt? Ende waer is de plaetse des verstants?

+ C vers 21

22

Sy is verholen voor den oogen alder leuender, oock verborghen den voghelen onder den Hemel.

23

De verdoemenisse ende de doot segghen: Wy hebben met onsen ooren haer gherucht ghehoort,

24

^† God weet den wech daer toe, ende kent haer plaetse.

† Mat. 11.e.25.

25

^* Want hy siet de eynden der Aerden, ende beschout al wat onder den Hemel is.

* Psal. 33.b.13. 2.Pa. 16.b.9. 2.Mach. 9.a.5 12.d.22.

26

Doen hy den winde zijn gewicht maecte,^† ende den water zijn gewisse mate settede:

† Eccl. 23.d.27 Iob. 26.b.10. Ierem. 5.d.21.

27

Doen hy den regen een perck maecte, ende den donder ende blixem den wech,

28

Doen sach hyse, ende verteldese, bereydese, ende hy vantse.

29

Ende sprack totten menschen:^† Siet, de vreese des HEEren, dat is wijsheyt, ende dat quaet te schouwen, dat is verstant.

† Psa. 111.b.10 Prou. 1.a.7. 9.b.10. Eccle. 1.c.16.