Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Van dit Capittel aen strijt Iob teghen zijne vrienden, tot int tweendertichste toe, Ende bewijst dat Godt niet en straft nae onse verdiensten, want hy (by andere menschen gherekent) oprecht si, ende nochtans gestraft wort.

1

⁺ENde Hiob sprack voorder, ende hief zijn sprueken op, ende seyde:

+ A vers 1

2

So warachtelijck als Godt leeft, die my mijn recht niet gaen en laet, ende de Almachtighe die mijn siele bedroeft,$

3

Also langhe als mijnen Adem in my is, ende dat snuyuen van Godt in mijnder nuesen is,

4

Mijn lippen en sullen niet onrechts spreken, ende mijn tonge en sal gheen bedroch seggen.

5

Dat sy verre van my, dat ic v recht soude geuen, tot dat mijn

[p. 195v]

eynde coemt en wil ick van mijnder vromicheyt niet wijcken.

6

Van mijnder gerechticheyt die ic hebbe, en wil ic niet aflaten. Mijn consciencie en bijt mi niet, van mijns gheheels leuens weghen.

7

^† Maer mijn viant sal een godloos beuonden worden, ende die hem tegen my oprecht, een ongerechtighe.

† Iob. 42.a.7.

8

Want wat is de hope des^† gheueysden, dat hy soo ghierich is, ende Godt doch zijn siele wech ruct?

† Huychelaers

9

Meynt ghy dat^† Godt zijn crijsschen hooren sal, als den ancxt ouer hem coemt?

† Prou. 1.c.28.

10

⁺Hoe can hy aenden Almachtighen lust gehebben, ende Godt eenmael aengheroepen?

+ B vers 10

11

Ick wil v leeren vander hant Gods, ende wat byden Almachtigen ghelt, en wil ick v niet helen.

12

Siet, ghy hout v altemael voer cloeck: Waerom gheef dy dan soodanighe onnutte dinghen voor?

13

Dat^† ist loon eens godtloosens mensches by Gode, ende dat erffenisse der tyrannen, dat sy vanden Almachtigen nemen sullen.

† Iob. 20.c.29.

14

Sal hy vele kinderen hebben, so sullen sy des sweerts zijn. Ende zijn nacomelinghen en sullen niet broots sat hebben.

15

⁺Sijn ouerbleuene sullen inden doot begrauen worden, ende zijn weduwen en sullen niet weenen.

+ C vers 15

16

Als hy ghelt te samen brengt ghelijck Aerde, ende vergadert cleeder als leem, soo sal hyse wel bereyden:

17

Maer die gherechtighe salse aen trecken, ende die ontschuldighe sal dat ghelt wtdeylen.

18

Hy timmert zijn huys als een spinne, ende ghelijc een^‡ Hoeder een schuere maect.

‡ Bewaerder

19

^* Als hem die rijcke neder leyt, en sal hijs niet mede^† rapen. Hy sal zijn oogen opdoen, ende daer en sal niet zijn.

* Luc. 12.b.20. Iob. 1.c.21. Psal. 49.c.18 Eccle. 5.b.14. 1.Tim. 6.b.7. Eccles. 11.b.10.

† oft nemen.

20

Verschrickinghe sal hem oueruallen als water, des snachts sal hem dat onweder wech nemen.

21

Den Oosten wint sal hem wech voeren, dat hy derwaerts vare, ende tempeest sal hem van zijnder plaetsen drijuen.

22

Hy sal sulcx ouer hem brenghen, ende en sal hem niet sparen. Alle dinck sal hem wt zijnen handen ontvlieden. Men sal ouer hem metten handen clappen, ende ouer hem^* tisschen, daer hy gheweest is.

* Blasen.