Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Noch is Iobs meyninghe, Alsmen na menschelijcker wijse soude voor God rechten, so soude hy oprecht zijn, Ende oft hy de vroomste ende ontschuldichste waer, so mocht noch effen wel hem Godt straffen, ende teghenspoet verleenen.

1

⁺HIob andtwoorde ende sprack:

+ A vers 1

2

Mijne redene blijft noch bedroeft, mijn macht is swack ouer mijne suchten.

3

Och dat ick wiste hoe ick hem vinden, ende tot zijnen stoel comen mochte:

4

Ende dat recht voor hem soude voorleggen, ende den mont vol straffinghe vaten:

5

Ende beuinden de redene, die hy my antwoorden soude, ende verstaen, wat hy my seggen soude.

6

Wil hy met grooter macht met my rechten? Hy en stelle hem also niet teghen my.

7

Maer legghe het my ghelijck voor, soo wil ick mijn recht wel winnen.

8

Mer gae ick nv stracx voor my wech, so en is hy daer niet: Gae ick te rugghe, soo en spuere ick hem niet.

9

Is hy ter slincker hant, so en crijghe ick hem niet: Verberghet hy hem ter rechter hant, so en sie ick hem niet.

10

⁺Maer hy kent mijnen wech wel,^* hy proeue my, so wil ick beuonden worden, gelijck als dat gout.

+ B vers 10

* 1.Pet. 1.b.7. Sap. 3.a.6.

11

Want ic sette mijnen voet op zijnder banen, ende houde zijnen wech, ende en wijcke daer niet af.

12

Ende en trede niet vanden gebode zijnder lippen, ende beware de reden zijns monts, meer dan ick schuldich ben.

13

Hy is eenich, wie wilt hem antwoorden? Ende hy maket, soo hy wilt.

14

Ende als hy my alschoon betaelt wat ick verdient heb, soo is dies noch meer daer achter.

15

Daerom verschricke ick voor hem, ende als ict mercke, so vreese ic my voor hem.

16

God heeft mijn herte bloode gemaect, ende de Almachtighe heeft my verschrict.

17

Want de duysternisse en makes geen eynde met my, ende de donckerheyt en wil voor my niet bedect worden.