Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Eliphas besluyt met zijnder redene, Aenghesien dat Iob ghestraft wordt, soo is hy een Godloos, Ende hy vertelt wat misdaden dat hy ghedaen heeft.

1

⁺DOen antwoorde Eliphas van Thema, ende sprac:

+ A vers 1

2

Wat behoeft God eenen stercken? Ende wat is hem een cloecke nut?

3

Meynt ghy dattet den Almachtighen wel beualle, dat ghy v soo vroom maect? Oft wat helpet hem, dat ghy uwe wegen alschoon sonder vlecke acht?

4

Meynt ghy dat hy hem voor v sal vreesen, v te straffen, ende met v voor tgerecht te treden?

5

Ia,^† uwe boosheyt is te groot, ende uwer misdaet en is gheen eynde.

† Iere. 2.c.16. Ozee. 13.b.9.

6

Ghy hebt uwe broederen eenich pant genomen sonder oorsake. Ghy hebt den naecten de cleederen wtghetrocken.

7

^† Ghy en hebt de vermoeyde niet ghelaeft met water, ende hebt den hongherigen v broot ontseyt.

† Iob. 27. 29. 30. 32. capittel.

8

Ghy hebt ghewelt inden lande geoeffent, ende vermetelijck daer in gheseten.

9

De weduwen hebt ghy ydel laten gaen, ende de armen der weesen ghebroken.

10

Daerom zijt ghy met stricken omuaen, ende vreese heeft v onuersiens verschrict.

11

En soudt ghy dan de duysternisse niet sien, ende de watervloet v niet bedecken?

12

⁺Siet, Godt is hooch daer bouen inden Hemel, ende siet de sterren daer bouen inder Hoochten,

+ B vers 12

13

Ende ghy spreect:^† Wat weet God daer af? Soude hy dat ghene, dat int doncker is, oordeelen connen?

† Eccle. 23.d.25. Ezech. 8.b.12. 9.c.9. Esaie. 29.c.15.

14

De Wolcken zijn zijne voordecsel, ende en siettet niet, ende wandelt inden omganck des Hemels.

15

Wilt ghy der werelt loop achten, daer in de ongerechte ghegaen hebben?

16

Die vergaen zijn, eer dan het tijt was, ende dat water heeft haren gront wech ghewasschen.

17

Die tot^† Gode seyden: Maect v van ons. Wat soude de Almachtighe hem gedoen connen?

† Iob. 21.b.14.

18

Daer hy nochtans haer huys met goeden veruult. Mer der godlooser meyninghe sy verre van my.

19

De^* gherechte sullent sien, ende hen verblijden, ende de ontschuldighe salse bespotten.

* Psal. 107.d.43.

20

Wat gheldet, haer wesen sal verdwijnen, ende haer ouerblijfsel sal dat vyer verslinden.

21

⁺Dus vereenicht v nv met hem, ende hebt vrede, daer wt sal v veel goets comen.

+ C vers 21

22

Hoort^* de wet van zijnen monde, ende vatet zijn redene in v herte.^†

* Pro. 2.a.1.

† Gen. 15.a.1. Deut. 4.e.29. 30.a.2.

23

Bekeert ghy v totten Almachtighen, so sult ghy ghesticht worden, ende onrecht verre van uwer Hutten doen.

24

So sult ghy voor Aerde gout gheuen, ende voor de steenen gulden beken.

25

Ende de Almachtighe sal dijn gout zijn: Ende siluer sal v toegehoopt worden.

26

Dan sult ghy uwen lust hebben aenden Almachtighen, ende v aensicht tot Gode opheffen.

27

^* So suldy hem bidden, ende hy sal v hooren, ende sult uwe gheloefte houden.

* Hier. 29.c.12. Matt. 7.a.7. Ioan. 14.b.13 16.c.23.

28

Wat ghy voor sult nemen, dat sal hy v laten ghelucken, ende dat licht sal op uwe weghen schijnen.

29

Want die hen verootmoedighen, die verhoort hy.^† Ende wie zijne ooghen neder slaet, die wort genesen,

† Prou. 29.c.23.

30

Ende de ontschuldighe sal behouden worden. Maer hy wordt^† behouden om zijnder handen reynicheyt wille.

† Oft verlost.