Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Sophar verhaelt hier de straffinge der hooueerdiger, godloosen, ende hypocrijten.

1

⁺DOen andtwoorde Sophar van Naema, ende sprack:

+ A vers 1

2

Daer op moet ick antwoorden, ende en can niet verbeyden. Ende wil gheerne hooren, wie my dat sal straffen ende omstooten.

3

Want den geest mijns verstants sal voor my andtwoorden.

4

En weet ghy niet, dat het altijt also gheghaen is, sint datter menscen opter Aerden geweest zijn,

5

Dat de beroeminge der godlooser niet lange en staet, ende de blijschap des hypocrijts een oogenblick duert?

6

^† Al waert dat zijn Hoochte oock inden Hemel reycte, ende zijn hooft aen de wolcken raecte,

† Psal. 37.e.35. 1.Mac. 2.g.63

7

So sal hy nochtans ten laetsten vergaen als eenen dreck, dat die ghene, van dien hy is aenghesien, sullen seggen: Waer is hy?

[p. 194r]

8

^* Ghelijck eenen droom vergaet, so en sal hy ooc niet gheuonden worden, ende gelijc een gesichte inder nacht verdwijnt.

* Psal. 73.c.20. Esaie. 29.b.7.

9

Welck ooge hem gesien heeft, dat en sal hem niet meer sien, ende zijne plaetse en sal hem niet meer beschouwen.

10

Sijne kinderen sullen gaen bedelen: Ende zijne hant sal hem moeyte te loon gheuen.$

11

Sijne gebeenten sullen zijn heymelijcke sonden wel betalen, ende sullen hen met hem inde Aerde neder legghen.

12

⁺Als hem de boosheyt alschoon in zijnen monde wel smaect, so salse hem doch in zijnder tongen faelgeren.

+ B vers 12

13

Sy sal hem verhouden worden, ende niet toeghelaten, ende sal hem geweeret worden in zijnen halse.

14

Sijne spijse binnen inden Lijue, sal haer veranderen in Aderen gallen.

15

De goeden, die hy verslonden heeft, moet hy weder wt braken, ende Godt salse wt zijnen buyck stooten.

16

Hy sal der Aderen galle suygen, ende de tonge der slangen sal hem dooden.

17

^† Hy en sal niet sien de stroomen noch de waterbeken, die met huenich ende boteren vloeyen.

† Iere. 17.b.6.

18

^† Hy sal arbeyden, ende des niet ghenieten, ende zijne goeden gheworden anderen lieden, dat hy van dien niet blijde en wordt:

† Iob. 5.a.5. Deut. 28.d.33.

19

Want hy heeft den armen verdruct ende verlaten.^† Hy heeft huysen tot hem getrocken, die hi niet getimmert en heeft.$

† Esaie. 5.b.8.

20

Want zijnen buyck en coste niet vol geworden, ende en sal door zijn costelijc goet niet ontcomen.

21

⁺Van zijnder spijsen en sal niet ouer blijuen. Daerom en sal zijn goet leuen gheen ghestadicheyt hebben.

+ C vers 21

22

^† Al heeft hy alschoon de volheyt ende genoech, so sal hem doch bange worden. Alderhande moeyte sal ouer hem comen.

† Eccle. 5.b.11.

23

Den buyck sal hem eens vol worden. Ende hy sal de verbolgentheyt zijnder gramschappen ouer hem seynden. Hy sal zijnen strijdt ouer hem reghenen laten.

24

Hy sal vlieden voor dat ijseren harnasch, ende den stalen boghe sal hem veriaghen.

25

Een bloot sweert sal door hem henen gaen, ende des sweerts blicken, dat hem bitter sal zijn, sal met verschricken ouer hem comen.

26

Daer en is gheen duysternisse, die hem bedecken mochte. Een vyer sal hem verslinden, dat niet opgheblasen en is, ende wie ouer bleuen is in zijnder Hutten, dien salt qualijck gaen.

27

Den Hemel sal zijne misdaet openbaren, ende de Aerde sal haer teghen hem setten.

28

Dat Coren in zijnen huyse sal wech geuoert worden, verstroyt inden dach zijnder toornicheyt.

29

^† Dat is dat loon eens Godloosens menschen by Gode, ende de erffenisse zijnder reden by Gode.

† Iob. 27.b.13.