Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Sophar die straft den man Hiob, Ende hy bewijst hem dat zijn sonden noch veel meer straffinghen verdient hebben. Ende dat hem niemant tegen Godt setten en sal, Ende daerom soo wijst hy hem tot lijdsaemheyt ende verduldicheyt.

1

⁺DOen antwoorde Sophar van Naema, ende sprack:

+ A vers 1

2

Als een lange ghesproken heeft, en moet hy oock niet hooren? Moet dan een Clappaert altoos recht hebben?

3

Moeten de lieden tot v groot snappen swijghen, dat ghy bespottet, ende niemant v en beschame?

4

Ghy segt:^† Mijne reden is reyn, ende ick ben louter voor uwen ooghen.

† Iob. 6.c.30. 16.b.17.

5

Och oft God met v sprake, ende dede zijne lippen open,

6

Ende dede v condt de Heymelijcke wijsheyt. Want hy had noch wel meer aen v te doen, op dat ghy wist, dat hy uwer sonden niet alle en gedenckt.

7

Meynt ghy, dat ghy soo veel weet als God weet, ende wilt alle dinck so volcomelijc treffen als de Almachtige?

8

Hy is hoogher dan den Hemel, wat wilt ghy doen? Dieper dan de Helle, wat cont ghy weten?

9

Langher dan de Aerde, ende breeder dan de See.

10

⁺Ist dat hyse om keert, oft verberget, oft in eenen hoope werpt, wie wilt hem besetten?

+ B vers 10

11

^† Want hy kent de loose lieden. Hy siet de onduecht, ende en soudet niet verstaen?

† 1.Reg. 16.b.7 Iere. 17.b.10.

12

Een onnut man blaest hem op, ende een gheboren mensch wilt zijn als een Ionck Wildt.

13

Waert dat ghy v herte had gherecht, ende uwe handen tot hem wtghebreyt.

14

Waert dat ghy de onduechde die in uwer hant is, verre van v hadt gedaen, dat in uwe Wooninge gheen ongherechticheyt en bleue,

15

Soo mocht ghy v aensicht opheffen onstraffelijck, ende sout vast zijn ende v niet vreesen.

16

Dan sout ghy der moeyten vergheten, ende so luttel ghedencken als des waters dat voor-

[p. 192r]

by gaet.

17

^† Ende den tijt ws leuens soude opgaen, als den middach, ende de duysternisse soude voort comen als den morgen.

† Esai. 58.b.8. Luc. 11.d.35.

18

Ende mocht v des troosten, datter noch hope voorhanden sy, ende sout met rusten int graf comen.

19

^† Ende ghy sout neder ligghen, ende niemant en soude v op veruaren, ende daer souder vele voor v smeecken.

† Leuit. 26.a.4

20

Maer de oogen der godlooser sullen vergaen, ende en sullent niet ontloopen mogen.^† Want hare hope sal haerder sielen faelgeren.

† Esaie. 57.b.11. Sapi. 5.c.15. Prou. 10.d.28 11.a.7. Iob. 8.b.13.