Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Iob straft zijne vrienden, Ende hy bewijst dat alle dinck ons gebuert wt een vrye Gods verkiesinghe, niet om onse verdienst oft onuerdienst, want de godloosen zijn gheluckiger dan de vrome, Hy beschrijft hier oock de almogentheyt Gods.

1

⁺DOen andtwoorde Hiob, ende sprack:

+ A vers 1

2

Ia ghy zijt de lieden, met v sal de wijsheyt steruen.

3

Ick hebbe also wel een herte als ghy, ende en ben niet minder dan ghy. Ende wie isser die sulcx niet en weet?

4

Wie van zijnen naesten belachen wort, die sal God aenroepen, die sal hem verhooren. De gherechtighe ende vrome moet belacht worden,

5

Ende is een veracht lichtteecken, inde ghedachten der stouten, Maer staet dat sy hen daer aen ergheren.

6

De Hutten der verstoorders hebben de volheyt, ende rasen teghen God coenlijck, hoe wel het hen God in haren handen ghegheuen heeft.

7

Vraecht doch den Vee, dat salt v leeren, ende de Vogelen onder den Hemel, die sullent v seggen.

8

Oft spreect metter Aerden, die salt v leeren, ende de Visschen, inder See sullent v vertellen.

9

⁺Wie en weet sulcx al niet, dat des HEEren hant dat ghemaect heeft?

+ B vers 9

10

Dat^† in zijnder hant de siele is, alles dat daer leeft, ende de geest alles vleeschs eens yegelijcken?$

† Sapien. 3.a.1.

11

^* En proeft de oore de reden niet? Ende de mont smaket de spijse?

* Iob. 34.a.3.

12

Ia^† byden grootvaderen is de wijsheyt, ende dat verstant by den ouden.

† Iob. 32.b.7.

13

By hem is wijsheyt ende ghewelt, raet ende verstant.

14

Siet als hy breect, soo en helpt gheen timmeren.^† Als hy yemanden besluyt, so en can niemant opgedoen,

† Esaie. 22.d.22. Apoc. 3.b.7.

15

Siet,^* als hijt water besluyt, soo wordet alle dinck dorre: Ende als hijt wtlaet, so keeret dat lant om.

* Esai. 50.a.2.

16

Hy is sterck, ende voertet wt. Sijne is beyde, die daer doolt, ende die daer verleyt.

17

⁺Hy leyt de cloecken als eenen roof, ende maect de Rechters dul.

+ C vers 17

18

Hy ontbint der Coningen bedwanc, ende gordet hare lendenen met eenen gordel.

19

Hy leyt de Priesters als eenen roof, ende laet faelgeren de stercken.

20

Hy^† keert wech de lippen der warachtiger, ende neemt de seden der Ouders wech.

† 2.Par. 18.c.22. Ezec. 14.b.9.

21

Hy ghiet verachtinghe op de Vorsten, ende maect dat verbont der gheweldigher los.

22

Hy^† opent de duyster gronden, ende brengt wt dat doncker aen dat licht.

† Luc. 12. a.2.

23

Hy maect sommige tot eenen grooten volcke, ende brengtse weder tot niet. Hy breydet een volck wt, ende drijuet weder wech.

24

Hy neemt wech den moet der Ouersten des volcx inden lande, ende doetse dolen op eenen onwech, daer gheenen wech en is,

25

Dat sy de duysternisse tasten sonder licht, ende doetse dolen als die daer droncken zijn.