Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Hy bewijst datter niemant sonder sonde en is, hy verbreyt dat lof des Almachtigen Gods ende zijnder weldaden, ende seyt hem salich te zijn die van God ghestraft wort.

1

⁺NOemt my eenen, wat gheldet, oft ghy eenen vindt? Ende siet v om yewers na eenen heylighen.

+ A vers 1

2

Maer eenen dullen verworcht de gramschap wel, ende den onwetenden doodet den^* ijuer.

* Hefticheyt Gods.

3

Ick sach eenen dullen in gewortelt, ende ick vloecte haestelijc zijn huis.

4

Sijne kinderen sullen verre zijn vanden^† Heyle, ende sullen verslaghen worden inder poorten, daer gheen verlosser zijn en sal.

† Bescherminghe.

5

De^‡ hongerighe sal zijnen oogst eten, ende de gewapende sullen hem halen, ende de dorstighe sullen zijn goet wt suypen.

‡ Deut. 28.d.33 Iob. 20.b.18.

6

Want moeyte en gaet niet wt der Aerden, ende ongheluck en wast niet wt den Acker.

7

Maer de mensche wort tot ongeluck geboren, ghelijc de vogelen sweuen, in de hoochte te vlieghen.

8

⁺Doch wil ick nv van Gode spreken, ende van hem handelen:

+ B vers 8

9

Die groote dingen doet, die niet te ondersoecken en zijn, en wonderlijcheden die niet te tellen en zijn.

10

Die den^† reghen opt Lant geeft, ende laet water comen op de straten.

† Deu. 28.b.12 Actor. 14..c.16

11

Die^* de nedere verhoocht, ende den bedroefden op helpt.

* 1.Reg. 2.b.7

12

Hy doet te niete, die^† aenslagen der listiger, dattet hare hant niet wtuoeren en can.

† Ghepeysen.

13

^‡ Hy vangt de wijsen in haerder listicheyt, ende stort der verkeerden Raet,

‡ 1.Cor. 3.c.19.

14

Dat sy des daechs in de duysternisse loopen,^* ende tasten inden middach als inder nacht.

* Esa. 59.b.10 2.Pet. 1.b.9. Deut. 28.c.29.

15

Ende helpt den armen vanden sweerde, ende van haren monde, ende vander hant des machtigen.

16

Ende is des armen hope, dat de boosheyt haren mont toe sal moeten houden.$

17

^† Siet, salich is de Mensche, dien God straft. Daerom en weygert v der castijnghe des almachtigen niet.

† Prou. 3.b.12. 1.Pet. 4.c.17. Hebr. 12.a.5.

18

^* Want hy quetset ende verbindet: Hy slaet ende zijn hant gheneest.

* Ose. 6.a.6. Deut. 32.f.39. Tob. 13.a.2.

19

^† Wt ses droeffenissen sal hy v verlossen, ende in de seuenste en sal v niet quaets aenroeren.

† 1.Co. 10.b.13

20

⁺Inder dierte sal hy v vander doot verlossen, ende inde oorloge van des sweerts hant.

+ C vers 20

21

Hy sal v verbergen voor de geessele der tongen^† dat ghy niet en vreest voor dat verderuen als het coemt.

† Psal. 91.a.5.

22

Int verderuen ende honger sult ghy lachen, ende voor de wilde dieren

[p. 190v]

inden Lande niet vreesen.

23

Mer v verbont sal zijn metten steenen opten velde: Ende de wilde dieren opt Lant, sullen vrede met v houden.

24

Ende sult beuinden dat uwe Hutte vrede heeft, ende sult v behuysinghe besorghen, ende niet sondighen.

25

Ende sult onderuinden dat ws saets vele sal worden, ende uwe nacomelinghen als dat gras opter Aerden.

26

Ende sult inden ouderdom ten graue comen, ghelijck als de^† schoouen ingheuoert worden tot zijnder tijt.

† Garuen.

27

Siet, dat hebben wy ondersocht, ende tis also. Dat hoort, ende mercket v.