Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ De vrienden ende maghen Hiobs comen om hem te troosten, ende willen bewijsen dat hy om zijnder sonden wille ghestraft wort.

1

⁺DOen antwoorde Eliphas van Theman ende sprack:

+ A vers 1

2

Ghy en hebbet misschien niet gheerne, ist datmen versoect met v te spreken: Maer wie cant ghelaten?

3

Siet, ghy hebt vele onderwesen, ende vermoeyde handen ghesterct.

4

Vwe redene heeft die geuallene opgerecht, ende die beuende knien hebt ghy becrachticht.

5

Mer nv het aen v coemt nv wordt ghy versaecht: Ende nv het v raect, nv verschrickt ghy.

6

Is dat uwe vreese (Gods) uwen troost, uwe hope, ende uwe vromicheyt?

7

Lieue gedenct: Waer is een die onschuldich was, vergaen? Oft waer zijn de gherechtighe oyt vernielt?

8

Ghelijck ick wel gesien heb,^† die daer moeyte ploechden, ende ongeluck sayden, ende oogstense oock inne,

† Prou. 22.a.8. Gala. 6.a.8.

9

Dat sy door den adem Gods zijn vergaen, ende vanden gheest zijnder gramschap vernielt.

10

Dat brullen der Leeuwen, ende de stemme der grooter Leeuwen, ende de tanden der iongher Leeuwen zijn ghebroken.

11

De Leeuwe is vergaen, dat hy niet meer en rooft, ende de ionghe Leeuwinnen zijn verstroyt.

12

⁺Ende tot my is een heymelijc woort gecomen, ende mijn oore heeft een woordeken wt den seluen ontfanghen:

+ B vers 12

13

Doen ick gesichten ouerdacht inder nacht, als den slaep op de lieden valt.

14

^† Doen quam my vreese ende beuen aen, ende alle mijn ghebeenten verschrickten.

† Dan. 10.c.15.

15

Ende doen den gheest voorby my ghinck, soo stonden my de hayren te berghe, aen mijn lichaem.

16

Doen stont een beelt voor mij-nen ooghen, ende ick en kende zijne gedaente niet. Het was stille, ende ic hoorde een stemme:

17

Hoe^† mach een mensche gherechter zijn dan God? Oft een man reynder zijn, dan die hem ghemaect heeft?

† Iob. 9.a.2. 25.a.4. Rom. 3.b.10. Psal. 143.a.2

18

^* Siet, onder zijne knechten en isser gheen sonder gebreck, ende in zijne^‡ boden vint hy sotheyt:

* Iob. 15.b.15. 2.Pet. 2.a.4. Iudas. a.6.

‡ Enghelen.

19

Hoe vele meer die in leemen huysen woonen, ende die op de aerde gefundeert zijn, sullen vanden wormen gheten worden?

20

Het duert van smorghens tot tsauonts toe, soo worden sy wt gehouwen, ende eer zijt gewaer worden, zijn sy geheelijck wech,

21

Ende die onder hen ouer blijuen, vergaen, ende steruen oock onuersiens.