Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Dat vleesch toont oock hier zijn onlijdsaemheyt. Ende hier werden de Persoonen der onlijdsamigen beschreuen, die teghen Gods oordeel rebelleren.

1

⁺DAer na dede Hiob zijnen mont op,

+ A vers 1

2

Ende veruloecte zijnen dach,^† ende sprack:

† Iere. 20.d.14.

3

Dien dach moet verloren zijn, daer ick in gheboren ben, ende dien nacht doemen seyde: Een knechtken is ontfanghen.

4

Den seluen dach moet duyster zijn, ende God van bouen daer af en moet niet na hem vragen. Geen schijnsel en moet ouer hem schijnen,

5

Duysternisse ende donckerheyt moeten hem ouerweldighen, ende dicke wolcken moeten ouer hem blijuen, ende den dompe aenden dach make hem grouwelijck.

6

Een donckerheyt moet dien nacht in nemen, ende en moet hem niet onder de daghen des iaers verblijden, noch int ghetal der maenden comen.

7

Siet, dien nacht moet eenlijck zijn, ende geen Iuychen daer inne zijn.

8

De veruloeckers des daechs, moeten dien veruloecken, ende die daer bereyt zijn te verwecken den Leuiathan.

9

Sijn sterren moeten duyster zijn in zijnder schemeringhe. Hy hope opt licht, ende ten come niet, ende en moete niet sien, dien opganck der dagheraet.

10

Dat hy niet besloten en heeft die duere^† mijns lichaems, ende niet verborgen dat ongeluck voor mijnen ooghen.

† Daer ick wt geboren werde, dat is des Moeders lichaem.

11

^* Waerom en ben ick niet ghestoruen van Moeders lichaem aen? Waerom en ben ick niet vergaen, doen ick wt den lichaem quam?

* Iere. 20.d.17 Iob. 10.c.18.

12

Waerom heeftmen my op den schoot ghenomen? Waerom ben ick met borsten ghesoocht?

13

⁺Soo laghe ick doch nv, ende waer stille, sliep ende had ruste

+ B vers 13

14

Metten Coninghen ende Raetsheeren op Aerden, die dat woeste timmeren:

15

Oft met den Vorsten die goudt hebben, ende hare huysen vol siluers

[p. 190r]

zijn.

16

Oft als een ontijdelijcke geboorte verborgen, ende niet en ware, als de ionghe kinderen, die dat licht noyt ghesien en hebben.

17

Aldaer moeten doch de ongodlijcke op houden met rasen. Aldaer rusten doch die vele moeyten ghehat hebben.

18

Daer hebben doch de gheuangenen vrede met malcanderen, ende en hooren de stemme des drenghers niet:

19

Daer zijn beyde cleyn ende groot, de knecht, ende die van zijnen Heere vrij gelaten is.

20

⁺Waerom is den katiuighen dat licht ghegheuen, ende dat leuen den bedroefden herten?

+ C vers 20

21

(Die de doot verwachten ende en coemt niet, ende soudense wel wt den verborghenen grauen,

22

Die hen wter maten seer verblijden ende zijn vrolijck, dat sy dat graf vercrijghen)

23

Ende den man welcx wech verborgen is, ende Godt voor hem den seluen bedect?

24

Want als ick eten sal, soo moet ick suchten, ende mijn huylen valt daer wt, als water.

25

Want dat ick gevreest hebbe, dat is ouer my ghecomen: Ende dat ick sorchde, dat heeft my gheraect.

26

En was ic niet ghelucsaem? En was ick niet fijn stille? En had ick niet goede ruste? Ende daer coemt sulcken onruste.