Den Bibel, Inhoudende dat Oude ende Nieuwe Testament (Biestkensbijbel)

[p. 188r]

¶ Dat .vij. Capittel.

¶ De Coninck ende Haman eten byder Coninghinnen Esther, die welcke den Coninck bidt voor haer volc, ende Aman viant van Mardocheo ende sinen volcke wort aender galgen ghehanghen, welcke hy Mardocheo eerst bereyt hadde.

1

⁺ ENde doen de Coninck met Haman quam, totter maeltijt die de Coninghinne Esther bereyt hadde,

+ A vers 1

2

Sprack de Coninc tot Esther des anderen daechs doen hy wijn ghedroncken hadde: Wat bidt ghy Coninghinne Esther, datment v gheue, ende wat begeert ghy? Ooc dat halue Conincrijc, het sal geschieden.

3

Esther de Coninghinne antwoorde ende sprack: Heb ick ghenade voor v gheuonden, O heer Coninck, ende behaghet den Coninck, soo gheeft my mijn leuen om mijnder beden wille, ende mijn volck, om mijns begheerens wille.

4

Want wy zijn vercocht, ic, ende mijn volck, dat wy verdaen, verworghet, ende vernielt souden worden. Ende of God wilde, dat wy doch tot knechten ende maerten werden vercocht, so wilde ic swijghen, so en soude de viant den Coninck doch niet schaden.

5

⁺ De Coninck Ahasueros sprack, ende seyde totter Coninghinnen Esther: Wie is die? oft waer is die? Die sulcx in zijnen sin nemen derf alsoo te doen?

+ B vers 5

6

Esther sprack: De Viant ende wederpartijder, is dese boose Haman. Maer Haman ontsettede hem voor den Coninck ende voor de Coninghinne.

7

Ende de Coninc stont op vander maeltijt ende vanden wijn, in zijnder verbolgentheyt, ende ginc inden Hof aen dat huys. Ende Haman stont op, ende badt de Coninghinne Esther om zijn leuen. Want hy sach, dat hem nv al een ongheluc vanden Coninck bereydt was.

8

⁺ Ende doen de Coninc weder wt den hof aent huys inde sael, daermen ghegeten hadde, quam, lach Haman aen de bancke, daer Esther op sat. Doen sprack de Coninck: Wil hy oock de Coninginne verworghen by my in huys? Doen dat woort wt des Conincx monde ghinc, bedecten si Haman dat aensicht.

+ C vers 8

9

Ende Harbona een vanden Camerlingen voor den Coninck, sprac: Siet, daer staet eenen boom inden huyse Haman, vijftich ellen hooch, dien hy Mardachai bereyt hadde, die wat goets voor den Coninc ghesproken heeft. De Coninck sprack: Laet hem daer aen hanghen.

10

Also^† hincmen Haman aenden boom, dien hy Mardachai bereydt hadde. Doen lach des Conincks gramschap.

† Dani. 6.e.24. Susa. 1.g.62. Psal. 7.b.16. Eccle. 10.b.4. Prou. 26.c.27 Eccle. 28.a.2.