Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Coninck beueelt Aman dat hy Mardocheo een groote eere bewijse, om te loonen de vrientscap die hy den Coninck bewesen heeft.

1

⁺ INder seluer nacht en coste de Coninck niet geslapen, ende hiet de Cronijcken ende de Historien brengen. Doen die voor den Coninck ghelesen werden,

+ A vers 1

2

Vantmen de plaetse, daer gescreuen was,^† hoe Mardachai hadde aenghebracht, dat die twee Camerlinghen des Conincx, Bigthana ende Theres, die aenden dorpel wacht hielden, toe geleyt hadden de hant aenden Coninck Ahasueros te slaen.

† 1.Hes. 2.d.21.

3

Ende de Coninck sprack: Wat hebben wy Mardachai voor eere ende goets daer voor ghedaen? Doen spraken de knapen des Conincx die hem dienden: Hem en isser niet voor gheschiet.

4

Ende de Coninc sprac: Wie is inden Hof? (Want Haman was inden Hof gegaen, daer buyten voor des Conincx huys, dat hy den Coninck soude segghen, Mardachai te hanghen aenden boom die hy hem toebereyt hadde)

5

Ende des Conincx knapen spraken tot hem: Siet, Haman staet inden Hof. De Coninck sprack: Laet hem in comen.

6

⁺ Ende doen Haman daer in quam, sprac de Coninck tot hem: Wat salmen dien man doen, dien de Coninck gheerne wilde eeren? Mer Haman dachte in zijn herte: Wien soude de Coninck anders geerne eere willen doen, dan my?

+ B vers 6

7

Ende Haman sprack totten Coninck: Dien man, dien de Coninc geerne wilde eeren,

8

Salmen brengen, datmen hem Conincklijcke cleederen aen trecke, die de Coninck plach te dragen, ende den Hengst daer de Coninck op rijdet, ende datmen de Conincklijcke Croone op zijn Hooft sette.

9

Ende men sal sulck cleet ende Hengst gheuen inde hant eens Vorsten des Conincx, dat de selue dien man cleede, dien de Coninc gheerne eeren wilde, ende voere hem op den Hengst inde straten der stadt, ende late voor hem roepen: Soo salmen doen dien man, dien de Coninck gheerne eeren wilde.

10

⁺ De Coninck sprac tot Haman, Haest v, ende neemt dat cleet ende den Hengst, soo ghy gheseyt hebt, ende doet also met Mardachai den Iode, die voor de poorte des Conincx sidt, ende en laet niet faelgeren, aen allen dien dat ghy ghesproken hebt.

+ C vers 10

11

Doen nam Haman dat cleet ende den Hengst, ende cleedede Mardachai, ende voerde hem op der stadt straten, ende riep voor hem: Alsoo salmen den man doen, den welcken de Coninck geerne eeren wilde.

12

Ende Mardachai quam weder aen de poorte des Conincks. Maer Haman haeste hem thuyswaerts, droech rouwe, met bedecten hoofde,

13

Ende vertelde zijnen wijue Seres, ende alle sine vrienden, al wat hem ontmoet was. Doen spraken sine wijse, ende zijn wijf Seres tot hem: Is Mardachai vanden sade der Ioden, voor welcken ghi hebt begost te vallen, soo en vermuecht ghy niet aen hem, maer ghy sult voor hem vallen.$

14

Maer doen si noch met hem spraken, quamen des Conincx Camerlingen daer by, ende dreuen Haman totter maeltijt te comen, die Esther bereyt hadde.