Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Esther coemt voor den Coninck, Sy noodet den Coninck ende Aman te gaste, Aman gheeft te kennen sinen nijt teghen Mardocheum.

1

⁺ ENde opten^† derden dach trock Esther de Coninclijcke cleederen aen, ende tradt binnen inden hof aent huys des

+ A vers 1

† 2.Hes. 2.a.1.

[p. 187v]

Conincx teghen dat huys des Conincks. Ende de Coninck sat op sinen Coninclijcken stoel, int Coninclijcke huys, tegen de duere des huys.

2

Ende doen de Coninck, Esther de Coninghinne sach staen inden Hof, vantse ghenade voor zijnen ooghen. Ende de Coninck recte den gulden scepter in zijn hant, tot Esther waert. Doen tradt Esther toe, ende roerde de spitse des scepters aen.

3

Doen sprack de Coninc tot haer: Wat is v Esther, ghy Coninghinne? Ende wat begheert ghy? Oock de helft des Conincrijcx sal v ghegheuen worden.

4

Esther sprack: Behaghet den Coninck, soo come de Coninck ende Haman heden totter maeltijt die ick bereyt hebbe.

5

De Coninck sprack: Haestet v, dat Haman doe, wat Esther gheseyt heeft.⁺ Doen nv de Coninck ende Haman totter maeltijt quamen, die Esther bereydt hadde,

+ B vers 5

6

Sprack de Coninc tot Esther, doen hy wijn ghedroncken hadde: Wat bidt ghy Esther? Het sal v gegeuen worden: Ende wat begheert ghy? Oock de helft des Conincrijcx, Het sal gheschieden.

7

Doen antwoorde Esther ende sprack: Mijn bede ende begheerte is,

8

Hebbe ick ghenade geuonden voor den Coninc, ende ist dattet den Coninck behaget, my te gheuen mijne bede, ende mijn begeerte te doen, soo come de Coninck ende Haman totter maeltijt, die ick voor hen bereyden wil, soo wil ick morgen doen wat de Coninck gheseyt heeft.

9

Doen ghinck Haman in dien daghe wt, vrolijck ende goets moets. Ende doen hy Mardachai sach inder poorten des Conincx, dat hy niet op en stont, noch hem voor hem en beweechde, werdt hy vol gramschappen ouer Mardachai.

10

⁺ Maer hy onthielt hem, ende doen hy int huys quam, sant hy henen, ende liet sine vrienden halen, ende zijn wijf Seres,

+ C vers 10

11

Ende vertelde hen de heerlijcheyt zijns rijckdoms, ende de menichte zijnder kinderen, ende alle dinck, hoe hem de Coninc so groot gemaect hadde, ende dat hy bouen de Vorsten ende knechten des Conincx verheuen ware.

12

Oock sprack Haman: Ende de Coninghinne Esther, en heeft niemant metten Coninck totter maeltijt die si bereyt hadde, laten comen, dan alleen my. Ende morghen ben ick oock tot haer ghenoot metten Coninck.

13

Maer in allen desen en hebbe ick niet ghenoech, alsoo langhe als ick den Iode Mardachai in Sconincks poorte sie sitten.

14

Doen sprack zijn wijf Seres, ende alle sine vrienden tot hem: Men bereyde eenen Boom vijftich ellen hooch, ende segt morghen den Coninck, datmen Mardachai daer aen hange, so coemt ghy metten Coninc vrolic totter maeltijt. Dat behaechde Haman wel, ende liet eenen boom bereyden.