Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Men soeckt den Coninck schoone ionckfrouwen, onder den welcken soo coemt oock Esther, welcke voor alle die andere den Coninck behaecht.

1

⁺ NAe dese gheschiedenissen, doen de verbolgentheyt des Conincx Ahasueros vercoelt was, ghedacht hy op Vasthi wat si ghedaen hadde, ende wat ouer haer besloten ware.

+ A vers 1

2

Doen spraken de knapen des Conincx die hem dienden: Men soecke den Coninc ionge schoone maechden,

3

Ende de Coninck bestelle toesienders in allen Landen zijns Conincrijcx, dat si alderhande ionghe schoone maechden te samen brenghen op de Borch Susan, int vrouwen

[p. 186v]

ghetimmer, onder de hant Hege, des Conincx Camerlincx, die de wijuen bewaert, ende gheue hen haer chieragie.

4

Ende welcke maecht den Coninck behaget, die werde Coninginne inde plaetse Vasthi. Dat behaechde den Coninck wel, ende hy dede alsoo.

5

Maer daer was een Iootsch man op de borch Susan, die hiet^† Mardachai, een sone Iair, des soons Simei, des soons Kis, des soons Iemini,

† 2.Hes. 4.a.1.

6

Die mede wech geuoert was van Ierusalem,^† doen Iechania den Coninck Iuda wech gheuoert wert, den welcken NebucadNezar de Coninc tot Babel wech voerde.

† 4.Re. 24.c.10

7

⁺ Ende hy was een Momber Hadassa, die is Esther, een dochter zijns^† Ooms: Want si en hadde noch Vader noch moeder. Ende si was een fijne ende schoone deerne. Ende doen haer Vader ende Moeder sterf, namse Mardachai aen tot eender dochter.

+ B vers 7

† Vaders broeder.

8

Doen nv dat gebot ende wet des Conincx vermaert wert, ende veel maechden te hoope ghebracht werden, op de Borch Susan, onder de hant Hegai, soo werdt Esther oock ghenomen in des Conincks huys, onder de hant Hegai des bewaerders der wijuen.

9

Ende die maecht behaechde hem wel, ende si vant ontfermherticheyt voor hem. Ende hy haeste met haerder vercieringhe, dat hy haer haer deel soude gheuen, ende seuen fijne deernen van des Conincx huys daer toe. Ende hy brachtse met haren maechden inde beste plaetse, int vrouwen ghetimmer.

10

Ende Esther en gaf hem haer volck ende haer maechschap niet te kennen. Want Mardachai had haer gheboden, dat zijt niet segghen en soude.

11

Ende Mardachai wandelde alle daghe voor den Houe, aent vrouwen ghetimmer, dat hy vernemen soude, oft Esther wel ghinghe, ende wat haer gheschieden soude.

12

⁺ Als dan den gesetten tijt elcker maecht quam, dat sy totten Coninck Ahasueros comen soude, nae dien si twaelf maenden lanck int vrouwen vercieren gheweest was (want haer vercieringhe moest soo veel tijts hebben, te weten, ses maenden met balsem ende myrre, ende ses maenden met goeder specerie, so waren de wijuen dan verciert)

+ C vers 12

13

Als dan ginc een maecht totten Coninc, ende de welcke sy hebben wilde, die moestmen haer doen, dat si met haer vanden vrouwen getimmer tot des Conincx huys ghinc.

14

Ende als eene des Auonts daer in quam, die ginc des morghens van hem in dat ander vrouwen ghetimmer, onder de hant Saasgas des Conincx Camerlincx, der Concubinen bewaerder. Ende si en moeste niet weder totten Coninck comen, het en was dat het den Coninck luste, ende lietse met name roepen.

15

Doen nv den tijt Esther aen quam, der dochter Abihail des Ooms Mardachai (die hi voor eene dochter hadde aenghenomen) dat si totten Coninck comen soude, en begheerde si niet, dan wat Hegai des Conincx Camerlinc, der vrouwen bewaerder sprack. Ende Esther vant genade voor alle diese aensaghen.

16

Ende Esther wert ghenomen tot den Coninck Ahasueros, int Coninclijcke huys, inder thienster maent, die daer hiet Thebeth, int seuenste iaer zijns conincrijcx.

17

⁺ Ende de Coninck creech Esther lief bouen alle wijuen, ende si vant genade ende ontfermherticheyt voor hem, voor alle maechden. Ende hy settede de Coninclijcke croone op haer hooft, ende maectese Coninginne in Vasthi stede.

+ D vers 17

18

Ende de Coninc maecte een groote maeltijt allen sinen Vorsten ende knechten, Dat was een maeltijt om Esthers wille. Ende liet de landen rusten, ende gaf Coninclijcke gheschencken wt.

19

Ende doemen anderwerf maechden vergaderde, sat Mardachai in de poorte des Conincx.

20

Ende Esther en hadde noch niet te kennen gegeuen haer maechschap noch haer volck, ghelijc haer Mardachia gheboden hadde. Want Esther dede nae den woorde Mardachai, ghelijc als doen hy haer Momber was.

21

^* Ter seluer tijt doen Mardachai inder poorten des Conincx sat, werden twee Camerlinghen des Conincx Bicthan ende Teres, die de dueren bewaerden, toornich, ende dachten haer handen aenden Coninc Ahasueros te slaen.

* 1.Hes. 6.a.2.

22

Dat wert Mardachia kenlijck, ende hy gaft der Coninghinnen Esther te kennen. Ende Esther seyt den Coninck in Mardachai name. Ende doemen daer nae vernam, wertet soo beuonden. Ende sy werden alle beyde aen boomen ghehangen: Ende twert gheschreuen in de Cronijcke voor den Coninck.