Den Bibel, Inhoudende dat Oude ende Nieuwe Testament (Biestkensbijbel)

[p. 186r]

Dat Boeck Esther.

¶ Dat eerste Capittel.

¶ Assuerus maecte een groote maeltijt sinen Heeren ende Vorsten, hy roept Vasthi zijn wijf tot hem ter maeltijt, maer si en coemt niet, Ende daerom wort si vanden rijcke verstooten.

1

⁺ INden tijde Ahasueros^† die daer Coninc was van India, tot Moren lant toe, ouer hondert ende seuenentwintich landen.

+ A vers 1

† 2.Hes. 1.a.1. 3.a.1.

2

Ende doen hy op zijnen Conincklijcken stoel sat, op de Borch Susan,

3

Inden derden iare zijns Conincrijcx, maeckte hy by hem een maeltijt allen sinen Vorsten ende knechten, te weten, den gheweldigen in Persen ende Meden, den Lantvoochden, ende Ouersten in sinen Landen,

4

Dat hy soude laten sien den heerlijcken rijcdom zijns conincrijcx, ende de costelike heerlijcheyt zijnder maiesteyt, veel daghen lanc, te weten, hondert, ende tachtentich daghen lanck.

5

Ende doen de daghen wt waren, maecte de Coninck een maeltijt alle den volcke, dat op der Borch Susan was, beyde groote ende cleyne, seuen dagen lanck, inden^† houe des Hofs, aent huys des Conincx.

† Pleyne.

6

Daer hinghen witte, roode, ende gheele lakens met lijnen ende scharlaken zeelen ghehecht in silueren ringhen, op Marmoren Columnen.⁺ De bancken waren gulden ende silueren, op plaueytsel, van groenen, witten, gheelen, ende swarten Marmorsteenen ghemaect.

+ B vers 6

7

Ende den dranck droechmen in gulden vaten, Ende altoos in andere ende andere vaten: Ende Coninclijcx wijns planteyt, so de Coninc vermocht.

8

Ende men en settede niemant wat hy drincken soude. Want de Coninc hadde allen voorstanders in sinen huyse beuolen, dat elck soude doen alsoot hem beliefde.

9

Ende de Coninghinne Vasthi maecte een maeltijt voor de wijuen inden Coninclijcken huyse des Conincx Ahasueros.

10

Ende opten seuensten dage, doen de Coninck goets moets was vanden wijne, hiet hy Mehuman, Bistha, Harbona, Bigtha, Abagtha, Sethar ende Charcas, de seuen Camerlingen, die voor den Coninc Ahasueros dienden,

11

Dat si de Coninghinne Vasthi souden halen voor den Coninc, met der Coninclijcker Croonen, dat hy den volcken ende Vorsten haer schoonheyt soude toonen:

12

Want si was gheheel schoone.

13

Maer de Coninghinne Vasthi en wilde niet comen, na den woorde des Conincx door zijn Camerlinghen. Doen wert de Coninc seer toornich, ende sine verbolghentheyt ontstack in hem.

14

⁺ Ende de Coninck sprac totten wijsen, die hen op lants seden verstonden (want des Conincx saken moesten gescien, voor alle verstandighe in recht ende handel.)

+ C vers 14

15

Maer de naeste by hem, waren: Charsena, Setar, Admatha, Tharsis, Meres, Marsena ende Memuchan, die seuen Vorsten der Persen ende Meden, die dat aensichte des Conincx saghen, ende saten bouen aen int Conincrijc:

16

Wat recht datmen aen de Coninginne Vasthi doen soude, om dat si niet ghedaen en hadde, nae den woorde des Conincx, door sine Camerlinghen.

17

Doen sprac Memuchan voor den Coninck ende de Vorsten: De Coninghinne Vasthi en heeft niet alleen aenden Coninck qualijck ghedaen, maer ooc aen allen Vorsten, ende aen allen volcken in allen landen des Conincx Ahasueros.

18

Want soodanigen daet der Coninginnen, sal wt comen tot allen wijuen, dat sy haer mans verachten voor haren oogen, ende sullen segghen:⁺ De Coninck Ahasueros hiet der Coninginnen Vasthi voor hem comen, maer si en wilde niet.

+ D vers 18

19

Soo sullen nv de Vorstinnen in Persen ende Meden oock alsoo segghen, tot allen Vorsten des Conincx, als si soodanigen daet der Coninginnen hooren: So salder verachtens ende toornicheyts ghenoech verheffen.

20

Behaghet den Coninck, soo laetmen een Coninclijc gebot van hem wtgaen, ende scrijuen nader Persen ende Meden wet, Het welckmen niet en derf ouertreden: Dat Vasthi niet meer voor den Coninc Ahasueros en come, ende de Coninck gheue haer Conincrijck haerder naester die beter is dan si.

21

Ende dat desen brief des Conincx die gemaect wort in sinen gheheelen rijcke (dat welck groot is) verbreydt worde, Dat alle wijuen haer mans in eeren houden, beyde onder den grooten ende cleynen.

22

Dat behaechde den Coninck ende den Vorsten wel, ende de Coninck dede nae de woorden Memuchan.

23

Doen werden brieuen wtghesonden in allen landen des Conincx, in elcken lande na zijnder scrift, ende tot elcken volcke nae zijnder talen, dat een yeghelijck man de ouerheere in sinen huyse sy. Ende liet spreken nae der talen zijns volcx.