Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Saneballat ende Tobias legghen Nehemie, laghen, ende veruolghen hem, om hem te dooden.

1

⁺ ENde doen Saneballat, Tobia ende Gosem de Arabite, ende onse ander vianden vernamen, dat ick de mueren ghetimmert hadde, ende datter gheen schuere meer aen en ware (hoe wel dat ic de dueren tot dier tijt noch niet ghehanghen en hadde, in de poorten)

+ A vers 1

2

Seynde Saneballat ende Gosem tot my, ende lieten my segghen: Coemt, ende laet ons te samen comen, in de dorpen, op den vlacken velde Ono: Mer si dachten mi quaet te doen.

3

Maer ick seynde boden tot hen, ende liet hen seggen: Ic hebbe een groot werc te beschicken, ic en can niet afcomen. Dat werck mocht achter blijuen, waert dat ic de hant af trocke, ende tot v af quame.

4

Sy seynden wel viermael tot my, op die maniere: Ende ick antwoorde hen op dese maniere.

5

⁺ Doen seynde Saneballat ten vijftenmael tot my sinen knape, met eenen openen brief in zijnder hant,

+ B vers 5

6

Daer in was gheschreuen: Het is voor de Heydenen comen, ende Gosem heeftet gheseyt, dat ghy, ende de Ioden denct af te vallen. Daer om timmert ghy oock de mueren, ende ghy wilt haer Coninck zijn in dese saken.

7

Ende ghi hebt v Propheten ghestelt, die van v wtroepen souden te Ierusalem, ende segghen: Hy is de Coninck Iuda. Nv, sulcx sal voor den Coninck comen. Soo coemt nv, ende laet ons met malcanderen raet houden.

8

Maer ick seynde tot hem, ende liet hem segghen; Sulcx en is niet gheschiet, dat ghy segt. Ghy hebbet wt uwer herten versiert.

9

Want si alle wouden ons veruaert maken, ende dachten: Sy sullen de handt af trecken van haren wercke, dat si niet en arbeiden. Maer ick stercte mijn hant dies te meer.

10

⁺ Ende ick quam in dat huys Semaia des soons Delaia, des soons Mehetabeel, ende hy hadde hem besloten, ende sprack: Laet ons te samen comen in dat huys Gods, midden inden Tempel, ende de dueren des tempels toesluyten. Want si sullen comen om v te dooden, ende sullen byder nacht comen, dat si v vermoorden.

+ C vers 10

11

Maer ick sprack: Soude een sulcken man vluchten? Soude een sulcken man als ick ben, inden Tempel gaen, dat hy leuende bleue? Ick en wilder niet ingaen.

12

Want ick mercte dat hem Godt niet ghesonden en had. Want hy seyde wel prophecien op my, maer Tobia ende Saneballat hadden hem ghelt ghegheuen.

13

Daerom nam hy ghelt, op dat ick my veruaren soude, ende also doen, ende sondighen, op dat si eenen quaden roep souden hebben, daer mede sy my lasteren mochten.

14

Ghedenct mijne Godt, des Tobia ende Saneballat, nae desen zijnen wercken, oock des Propheten Noadia, ende der andere Propheten, die my daer af wilden veruaren.

15

⁺ Ende de muere wert reede inden vijfentwintichsten daghe der maent Elul, in tweenvijftich daghen.

+ D vers 15

16

Ende doen alle onse vianden dat hoorden, vreesden alle Heydenen, die rontsom ons waren, ende den moet ontuiel hen. Want si mercten, dat dit werck van Godt was.

17

Oock warender ter seluer tijt vele der Ouerster Iuda, der welcker brieuen gingen tot Tobia, ende van Tobia tot hem.

18

Want haerder wasser veel in Iuda die hem gesworen waren. Want hy was een swager Sachania, des soons Arah, ende zijn soon Iohanan had de dochter Mesullam, des soons Berechia.

19

Ende seyden alle goet van hem voor my, ende droeghen mijne woorden ouer tot hem. So seynde dan Tobia brieuen, om my daer af te veruaren.