Den Bibel, Inhoudende dat Oude ende Nieuwe Testament (Biestkensbijbel)

Dat Boeck Nehemia.

Dat eerste Capittel.

¶ Nehemias is droeuich, ende hy beclaghet de gheuanckenisse des volcx.

1

⁺ DIT zijn de gheschiedenissen Nehemia, des soons Hachalia. Het geschiede inder maent Chislef, des twintichsten Iaers, dat ick was tot Susan opt slot,

+ A vers 1

2

Doen quam Hanani een van mijnen broederen met sommighe mannen wt Iuda. Ende ick vraechde haer, hoe het den Ioden ghinghe, die behouden ende ouerbleuen waren vander geuanckenissen, ende hoe het te Ierusalem stont.

3

Ende sy spraken tot my: De ouerbleuene vander geuanckenissen zijn aldaer inden lande in grooten ongheluck ende smaet.^† De mueren Ierusalems zijn ghebroken, ende hare poorten met vyer verbernt.

† 4.Re. 25.b.10 2.Par. 36.c.19

4

Doen ick sulcke woorden hoorde, sat ick, ende weende, ende droech rouwe twee daghen lanck, ende vastede, ende badt voor den God des Hemels, ende sprac:

5

^† Och HEEre God vanden Hemel, ghy groote ende verschrickelijcke Godt,^* die daer hout dat verbont ende bermherticheyt, den ghenen die hem lief hebben, ende zijne gheboden houden.

† 2.Esd. 9.e.32 Dan. 9.a.4.

* Exo. 20.a.5. 34.a.7. Deut. 7.b.9.

6

Laet doch uwe ooren opmercken, ende uwe oogen open zijn, dat ghi dat gebet ws knechts hooret dat ic nv voor v bidde, dach ende nacht, voor de kinderen Israels uwe knechten, ende bekenne de sonden der kinderen Israels die wy aen v ghedaen hebben.⁺ Ende ick, ende mijns Vaders huys, hebben oock ghesondicht.

+ B vers 6

7

Wy zijn verdoruen gheworden, dat wy niet ghehouden en hebben de gheboden, beuelen ende Rechten, die ghy gheboden hebt uwen knecht Mose.

[p. 180v]

8

Maer ghedenct doch des woorts, dat ghy uwen knecht Mose gheboot ende spraect:^† Als ghy v vergrijpt, soo wil ick v onder de volcken verstroyen.

† Deut. 30.a.1.

9

Maer ist dat ghy^† v bekeert tot my, ende houdet mijne gheboden, ende doetse. Ende al waert ghy oock verstooten tot aen dat eynde des Hemels, so wil ic v nochtans van daer verghaderen, ende wil v brenghen totter plaetsen die ick vercoren hebbe, dat mijnen Naem aldaer soude woonen.

† 2.Par. 6.g.37

10

Sy zijn doch ymmer uwe knechten ende v volck^† die ghy verlost hebt, door uwe groote cracht, ende machtighe hant.

† Exo. 14.f.30.

11

Och HEERE laet uwe ooren opmercken, op dat ghebet dijns knechts, ende op dat ghebet uwer knechten, die daer begheren uwen Naem te vreesen. Ende laettet uwen knecht heden ghelucken, ende geeft hem bermherticheyt voor dese mannen. Want ic was des Conincx Schencker.