Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Sy maken een verbondt dat sy de wijuen verlaten willen, Ende welcke dese gheweest zijn, die worden hier ghenoemt.

1

⁺ ENde doen^† Esra also badt, ende bekende, weende, ende voor den huyse Gods lach, vergaderde een seer groote ghemeynte van Mannen, ende Wijuen ende kinderen wt Israel tot hem: Want dat volck weende seer.

+ A vers 1

† 3.Esd. 8.g.93.

2

Ende Sachania de sone Iehiel vanden kinderen Elam, antwoorde, ende sprac tot Esra: Wel aen, wy hebben ons aen onsen Godt vergrepen, dat wy vreemde wijuen vanden Volcken des Lants genomen hebben. Nv daer is noch een hope in Israel ouer dien.

3

Soo laet ons nv een verbont maken met onsen God, dat wy alle wijuen ende die van hen geboren zijn, wech doen, na den raet des HEEren, ende der gheender die de gheboden ons Gods vreesen, datmen doe na de Wet.

4

So maect v nv op, want het behoort v toe, wy willen met v zijn. Hebt eenen goeden moet, ende doetet.

5

⁺ Doen stont Esra op, ende nam eenen eedt vanden Ouersten Priesteren, ende Leuiten, ende den geheelen Israel, dat sy na dese woorden doen souden. Ende sy swoeren.

+ B vers 5

6

^† Ende Esra stont op voor dat huys Gods, ende ghinc inde Camer Iohanan des soons Eliazab. Ende doen hy aldaer quam, en adt hy gheen broot, ende en dranck gheen water. Want hy droech rouwe om der vergrijpinge wille der gheender die gheuanghen gheweest waren.

† 3.Esd. 9.a.1.

7

Ende sy lieten wtroepen door Iuda ende Ierusalem, tot alle kinderen die gheuanghen geweest waren, dat sy te Ierusalem souden vergaderen.

8

Ende de welcke niet en quamen binnen drie daghen, na den raet der Ouersten ende Ouders, dies Haue soude altemael verbannen zijn, ende hy afghescheyden vander ghemeynten der gheuanghenen.

9

⁺ Doen vergaderden alle mannen Iuda ende BenIamin te Ierusalem, binnen drie daghen, dat is inden twintichsten daghe der negender maent, ende allet volck sat op de strate voor den huyse Gods, ende beefden om der saken wille, ende vanden reghen.

+ C vers 9

10

Ende Esra de Priester stont op, ende sprac tot hen:^† Ghy hebt v vergrepen, dat ghy vreemde wijuen ghenomen hebt, dat ghy der schult Israels noch meer sout maken.

† Deut. 7.a.3. Iudic. 3.a.5.

11

Dus belijdt nv den HEEre uwer vaderen God, ende doet zijn welbehaghen, ende scheydet v vanden volcke des Lants, ende vanden vreemden wijuen.

12

Doen antwoorde de geheele gemeynte

[p. 180r]

ende sprack met luyder stemmen: Het geschiede, so ghy gheseyt hebt.

13

Maer des volcx is vele, ende een reghenachtich weder, ende en can hier buyten niet gestaen. Oock so en ist niet eens oft tweeder daghen werck: Want wy hebben sulcker ouertredinghe vele gemaect.

14

⁺ Laet ons onse Ouerste bestellen inder gheheelder ghemeynten, dat alle die in onse steden vreemde wijuen ghenomen hebben, tot ghesetten tijden comen, ende de Ouders van elcker stadt, ende hare Rechters mede, tot dat van ons ghekeert worde de gramschap ons Godts, om deser saken wille.

+ D vers 14

15

Doen werden ghestelt Ionathan de Sone Azahel, ende Iehasia de sone Thikwa, ouer dese sake. Ende Mesullam, ende Sabthai, de Leuiten holpen hen.

16

Ende de kinderen der gheuanckenissen deden also. Ende de Priester Esra, ende de principaelste Vaders, in haerder Vaderen huysen, ende alle voorgenoemde scheyden sy, ende sy saten opten eersten dach der thienster maent om dese sake te verhooren.

17

Ende sy bolbrachtent aen alle mannen die vreemde wijuen hadden, inden eersten daghe der eerster maent.

18

^† Ende onder de kinderen der Priesteren, werden geuonden, die vreemde wijuen ghenomen hadden, te weten, onder de kinderen Iesua, des soons Iozadak, ende zijne broederen: Maeseia, Eliezer, Iarib, ende Gedalia.

† 3.Esd. 9.b.19

19

⁺ Ende sy gauen hare hant daer op, dat sy de wijuen wilden wtstooten, ende tot haren Schuldtoffer eenen Ram voor haer schuldt gheuen.

+ E vers 19

20

Onder den kinderen Immer: Hanani, ende Sabadia.

21

Onder den kinderen Harim: Maeseia, Elia, Semaia, Iehiel ende Vsia.

22

Onder de kinderen Pashur: Elioenai, Maeseia, Ismael, Nethaneel, Iosabad, ende Eleasa.

23

Onder de Leuiten: Iosabad, Simei, ende Kelaia, (Hy is de Klita) Pethahia, Iuda ende Eliezer.

24

Onder de Sanghers: Eliasib. Onder de Poortiers: Sallum, Telem, ende Vri.

25

Van Israel. Onder de kinderen Pareos: Ramia, Iesia, Malchia, Meiamin, Eleazar, Malchia, ende Benaia.

26

Onder de kinderen Elam: Mathania, Sacharia, Iehiel, Abdi, Ieremoth, ende Elia.

27

Onder de kinderen Sathu: Elioenai, Eliasib, Mathania, Ieremoth, Sabad, ende Asisa.

28

Onder de kinderen Bebai: Iohanam, Hanania, Sebai, ende Athlai.

29

⁺ Onder de kinderen Bani: Mesullam, Malluch, Adaia, Iasub, Seal, ende Ieremoth.

+ F vers 29

30

Onder de kinderen PahathMoab: Adna, Chelal, Benaia, Maeseia, Mathania, Bezaleel, Benui, ende Manasse.

31

Onder de kinderen Harim: Elieser, Hesia, Malchia,

32

Semaia, Symeon, BenIamin, Malluch, ende Samaria.

33

Onder de kinderen Hasum: Mathnai, Mathatha, Sabad,

34

Elipheleth, Ieremia, Manasse, ende Simei.

35

Onder de kinderen Bani: Maedai, Amram, Huel,

36

Benaia, Bedia, Chelui,

37

Naia, Meremoth, Eliasib,

38

Mathania, Mathnai, Iaesan,

39

Bani, Benui, Simei, Selemia, Nathan, Adaia,

40

Machnadbai, Sasai, Sarai,

41

Asareel, Selemia, Samaria,

42

Sallum, Amaria, ende Ioseph.

43

Onder de kinderen Nebo: Ieiel, Mathithia, Sabad,

44

Sebina, Iaddai, Ioel, ende Benaia.

45

Dese hadden altemael vreemde Wijuen ghenomen, Ende daer waren sommige onder de selue Wijuen, die kinderen ghedraghen hadden.

¶ Eynde des Boecx Esra.