Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Hier worden sommighe genoemt, die met Esdra opgetoghen zijn, ende wat daer gheschiet is.

1

⁺ DIt^† zijn de Hoofden haerder Vaderen die gherekent werden, die met my op trocken van Babel, inden tijden doen de Coninck Arthahsastha regeerde.

+ A vers 1

† 3.Esd. 8.c.32.

2

Vanden kinderen Pinehas: Gerson. Vanden kinderen Ithamar: Daniel.

3

Vanden kinderen Dauids: Hattus.

4

Vanden kinderen Sechania, der kinderen Pareos: Sacharia, ende met hem mans persoonen gherekent hondert ende vijftich.

5

Vanden kinderen PahathMoab: Elioenai, de sone Serahia, ende met hem twee hondert

[p. 179r]

mans persoonen.

6

Vanden kinderen Sechania: De sone Iehasiel, ende met hem drie hondert mans persoonen.

7

Vanden kinderen AdinEbed: De sone Ionathan ende met hem vijftich mans persoonen.

8

Vanden kinderen Elam: Iesaia, de sone Athalia, ende met hem tseuentich mans persoonen.

9

Vanden kinderen Sephatia: Sebadia de sone Michael, ende met hem tachtentich mans persoonen.

10

Vanden kinderen Ioab: Obadia, de sone Iehiel, ende met hem twee hondert ende achthien mans persoonen.

11

Vanden kinderen Selomith: De sone Iosiphia, ende met hem hondert ende tsestich mans persoonen.

12

⁺ Vanden kinderen Bebai: Sacharia de sone Bebai, ende met hem achtentwintich mans persoonen.

+ B vers 12

13

Vanden kinderen Asgad: Iohanan de ioncste soon, ende met hem hondert ende thien mans persoonen.

14

Vanden laetsten kinderen Adonicam, ende hieten alsoo: Elipheleth, Ieiel, ende Semaia, ende met hem tsestich mans persoonen.

15

Vanden kinderen Bigeuai: Vthai ende Sabud, ende met hen tseuentich mans persoonen.

16

Ende ick vergaderdese aent water, dat tot Aheua coemt, ende bleuen drie daghen aldaer. Ende doen ick acht hadde opt volck ende Priesters, so en vant ic aldaer geenen Leuijt.

17

Doen seynde ic Eliezer, Ariel, Semaia, Elnathan, Iarib, Elnathan, Nathan, Sacharia, ende Mesullam de Ouersten, ende Ioiaril, ende Elnathan de Leeraers,

18

Ende seyndese wt tot Iddo den Ouersten tot Casphia, dat sy ons Dienaers inden huyse ons Gods souden halen. Ende ick gaf hen in wat sy spreken souden met Iddo, ende zijnen broederen den Nethinim tot Casphia.

19

⁺ Ende sy brachten ons na der goeder hant ons Gods ouer ons eenen cloecken man vanden kinderen Maheli, des soons Leui, des soons Israels, Serebia met zijnen sonen ende broederen achthien.

+ C vers 19

20

Ende Hasabia, ende met hem Iesaia vanden kinderen Merari, met zijnen broederen ende haren sonen, twintich.

21

Ende vanden Nethinim, die Dauidt ende de Vorsten gauen te dienen den Leuiten, twee hondert ende twintich, alle met namen genoemt.

22

^† Ende ick liet aldaer aent water by Aheua een vasten wtroepen, dat wy ons souden verootmoedighen voor onsen Godt, om te soecken van hem eenen rechten wech, voor ons ende onse kinderen, ende al onse Haue.

† 3.Esd. 8.d.52.

23

Want ick schaemde my vanden Coninc geleye, ende Ruyters te begheren, ende ons tegen de Vianden te helpen op den weghe. Want wy hadden den Coninck gheseyt: De handt ons Gods is totten besten ouer al die hem soecken: Ende zijne stercheyt ende toornicheyt, ouer alle die hem verlaten.

24

Also vasten wy ende versochten sulcx aen onsen God, ende hy hoorde ons.

25

⁺ Ende ick scheyder twelf wt vanden Ouersten Priesteren, Serebia, ende Hasabia, ende met hen haerder broeders thien,

+ D vers 25

26

Ende woech hen ouer dat siluer ende gout, ende vaten ter Heffinge, den huyse ons Gods, welcke de Coninck ende zijne Raetsheeren, endeVorsten, ende geheel Israel, dat voor handen was, totter Heffinge ghegheuen hadden.

27

Ende woech hen ouer onder hare hant, ses hondert ende vijftich Centner siluers, ende aen silueren vaten hondert Centner, ende aen goude hondert Centner, twintich gulden bekers, die hadden duysent gulden, ende twee goede metalen costelijcke vaten, louter als gout,

28

Ende sprack tot hen: Ghy zijt heylich den HEEre, ende de vaten zijn ooc heylich, daer toe alle vrij ghegeuen siluer ende goudt, den HEEre uwer vaderen Godt.

29

Dus waect nv, ende bewaertet, tot dat ghijt ouer weget voor den oppersten Priesteren ende Leuiten, ende den oppersten Vaderen in Israel te Ierusalem, inde kisten des huys des HEEren.

30

^† Doen namen de Priesters ende Leuiten dat ghewegen siluer ende gout, ende vaten, dat sy dat souden brenghen na Ierusalem totten huyse ons Gods.

† 3.Esd. 8.e.62.

31

⁺ Also braken wy op vanden water Aheua inden twelfsten daghe der eerster maent, dat wy na Ierusalem trecken souden, ende de hant ons Gods was ouer ons, ende verloste ons vander handt der Vianden, ende der gheenre, die op ons loerden opten wege.

+ E vers 31

32

Ende quamen te Ierusalem, ende bleuen aldaer drie dagen.

33

Maer opten vierden dach wert dat siluer, ende goudt, ende vaten int huys ons Gods gheweghen, onder de handt Meremoth des soons Vria des Priesters, ende met hem Eleazar den soon Pinehas, ende met hen Iosabad den sone Iesua, ende Noadia den sone Benui den Leuijt,

34

Na dat ghetal ende ghewichte eens yeghelijcx. Ende dat ghewichte wert op die tijt al beschreuen.

35

Ende de kinderen der gheuanckenissen, die wt de gheuanckenisse ghecomen waren, offden Brandtoffer den Gode Israels, twelf Ossen voor dat gheheele Israel, sesentnegentich Rammen, seuenentseuentich Lammeren, twelf Bocken totten Sondoffer, alle totten Brandtoffer den HEERE.

36

Ende sy leuerden des Conincx beuel ouer, den Officiers des Conincx, ende den Lantvoochden ouer dese sijde des waters. Ende sy verhieuen dat volck ende dat huys Gods.