Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Esdras wort van Artaxerse te Ierusalem ghesonden, met een beuel aen de voochden aen ghene sijde des waters.

1

⁺ NA dese gheschiedenisse int Conincrijcke Arthahsastha^* des Conincx in Persen, troc op van Babel^† Esra de sone Seraia, des soons Azaria, des soons Hilkia,

+ A vers 1

* 3.Esd. 8.a.1.

† 4.Esd. 1.a.1

2

Des soons Sallum, des soons Sadok, des soons Ahitok,

3

Des soons Amaria, des soons Azaria, des soons Meraioth, de soons Serahia, des soons Vsi, des soons Buki,

4

Des soons Abisua, des soons Pinehas, des soons Eleazar, des soons Aaron, des Ouersten Priesters,

5

Welcke een^† gheschict Schriftgeleerde inde Wet Mose was^* dat de HEEre de God Israels ghegheuen heeft. Ende de Coninc gaf hem al wat hi begheerde, na de hant des HEEren zijns Gods ouer hem.

† Bequaem

* Exod. 20.a.1.

6

Ende sommige der kinderen Israels, ende der Priesteren ende Leuiten, der Sanghers, der poortiers, ende der Nethinim, trocken op na Ierusalem int seuenste iaer Arthahsastha des Conincx.

7

Ende sy quamen te Ierusalem inder vijfster maent. Dat is, dat seuenste iaer des Conincx (want inden eersten dach der eerster maent, wert hy des sins om op te trecken van Babel)

8

Ende inden eersten daghe der vijfster maent, quam hy te Ierusalem, na der goeder hant Gods ouer hem:

9

Want Esra stierde zijn herte te soecken, de wet des HEEren, ende te doen, ende te leeren in Israel, gheboden ende rechten.

10

⁺ Ende dit is dat inhout des briefs, dien de Coninck Artahsahstha gaf Esra den Priester, den Schriftgheleerden, die een Leeraer was inde woorden des HEEren, ende zijnder gheboden ouer Israel:

+ B vers 10

11

Arthasahstha Coninc aller Coningen. Esra den Priester ende Schriftgheleerden inder wet des Gods vanden Hemel, vrede ende groete.

12

Van my ist beuolen, dat alle die daer vrijwillich zijn in mijnen rijcke, vanden volck Israels, ende de Priesteren ende Leuiten na Ierusalem te trecken, dat die met v trecken.

13

Vanden Coninck, ende de seuen Raetsheeren wtgeseynt, te besoecken Iuda ende Ierusalem, na de Wet Godts die onder uwe hant is,

14

Ende mede nemet siluer ende gout, dat de Coninck, ende zijn Raetsheeren vrijwillichlijc geuen den Gode Israels, diens wooninghe te Ierusalem is.

15

Ende alderley siluer ende gout dat ghy geuinden cont int geheele Lantschap te Babel, met dien, dat dat volck, ende de Priesters vrijwillichlijc geuen, totten huyse Gods te Ierusalem.

16

⁺ Alle dat selue neemt, ende coopet met vlijte vanden seluen gelde, Calueren, Lammeren, Bocken, ende Spijsoffer, ende Dranc-offer, datmen offere opten Altaer byden huyse ws Gods te Ierusalem.

+ C vers 16

17

Daer toe wat v, ende uwen broeders met den ouerschotenen gelde belieft te doene, dat doet, na den wille ws Gods.

18

Ende de vaten die v ghegeuen zijn totten dienste inden huyse ws Gods, leuert ouer voor Gode te Ierusalem.

19

Ooc wat meer van noode zijn sal, totten huyse ws Gods, dat v geualt wt te gheuen, dat laet gheuen wt der Cameren des Conincx.

20

Ic Coninc Arthahsastha heb dit beuolen den schatmeesteren ouer ghene sijde des waters, dat soo wat Esra van v eysschen sal, de Priester ende Schriftgheleerde inder Wet Gods vanden Hemel, dat ghy dat neerstelijck doet,

21

Tot hondert Centner siluers toe, ende tot hondert Cor Terwen toe, ende tot hondert Bat Wijns, ende tot hondert Bat Olys, ende Souts sonder mate.

22

Alle wat totter Wet Gods vanden Hemel behoort, datmen dat selue neerstelijck doe, totten huyse Godts vanden Hemel, op datter gheen gramschap en come ouer des Conincx Conincrijcke, ende zijne kinderen.

23

⁺ Ende v sy condt, dat ghy gheen macht en hebt, Chijns, Tol, ende iaerlijcsce renten te leggen op eenigen Priester, Leuijt, Sanger, Poortier, Nethinim, ende Dienaren inden huyse deses Godes.

+ D vers 23

24

Maer ghy Esra na der wijsheyt ws Godts die onder uwe hant is, stelt Rechters ende Officiers, die allet volck rechten dat ouer gheen sijde des waters is. Alle die de Wet ws Gods weten,

25

Ende die het niet en weten, dien leeret. Ende alle die niet met neersticheyt de Wet ws Gods, ende de Wet des Conincx doen en sal, die sal zijn oordeel om dier daet wille hebben, het sy totten doot, oft inde banninghe, oft ter bruecken aen goet, oft inde gheuanckenisse.

26

Gheloeft zij de HEEre onser vaderen Godt, die sulcx den Coninck in heeft ghegeuen, dat hy dat huys Gods te Ierusalem soude vercieren.

27

Ende heeft tot my ontfermherticheyt geneycht, voor den Coninck ende zijne Raetsheeren, ende allen geweldighen des Conincx. Ende ic wert getroost na der hant des HEEren mijns Gods ouer my, ende vergaderde de Hoofden wt Israel, dat sy met my op souden trecken.