Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Darius de Coninck vernieut dat beuel Tyri, hy gheeft den Ioden oorlof te bouwen den Tempel.

1

⁺ DOen^† beual de Coninck Darius, datmen soecken soude inde Cancelrije, inden schathuyse des Conincx die te Babel lach.

+ A vers 1

† 3.Esd. 6.d.23.

2

Doen vantmen te Ahmetha int slot dat in Meden leyt, een boeck, ende daer stont een gheschiedenisse in, alsoo gheschreuen.

3

Int eerste iaer des Conincx Cores, beual de Coninck Cores dat huys Gods te Ierusalem te timmeren, in de plaetse daermen offert, ende dat fondament te legghen, ter hoochten tsestich ellen, ende ter wijde ooc tsestich ellen.

4

Ende drie wanden van alderhande steenen, ende eenen wandt van houte. Ende den cost sal vanden huyse des Conincx ghegeuen worden.

5

Daer toe de gulden ende silueren vaten des huys Gods, die NebucadNezar wt den Tempel te Ierusalem ghenomen, ende na Babel ghebracht had, salmen weder geuen, datse weder gebracht worden inden Tempel te Ierusalem, op hare plaetse inden huyse Gods.

6

Dus maect v nv verre van hen, ghy Thathnai Lantvoocht op gene sijde des waters, ende StarBosnai, ende haren raet van Apharsach, ghy die aen ghene sijde des waters zijt.

7

⁺ Laetse arbeyden aenden huise Gods, dat der Ioden Lantvoocht, ende haer Ouders dat huys Gods timmeren op zijn stede.

+ B vers 7

8

Oock ist van my beuolen, watmen den Ouders Iuda doen sal, om te timmeren dat huys Gods: Te weten, datmen van des Conincx goeden, vanden renten aen gene sijde des waters met neersticheyt opheffe, ende gheuet den lieden, ende datmen hen niet en belette.

9

Ende of sy behoeuen^† Calueren, Lammeren, of Bocken, totten Brantoffer den Godt vanden Hemel, Terwe, Sout, Wijn, ende Olie, na der wijse der Priesters te Ierusalem, salmen hen daghelijcx gheuen haer toebehoorte.

† 3.Esd. 6.e.29.

10

Ende dat sulcx niet versuymelijc en gheschiede, op dat sy offeren tot eenen soeten ruecke den God vanden Hemel, ende bidden voor des Conincx leuen, ende zijnder kinderen.

11

Van my is sulcken beuel geschiet: Ende welck mensche dese woorden verandert, van dies huys salmen eenen balc nemen ende oprechten, ende hem daer aen hanghen. Ende zijn huys sal den gerichte veruallen zijn, om dier daet wille.

12

⁺ Mer de God die inden hemel woont, verdoe alle Coninghen, ende volck, dat zijne hant wtstrect om te veranderen ende te breken, dat huys Gods in Ierusalem, Ick Darius hebbet beuolen, dat het met neersticheyt ghedaen worde.

+ C vers 12

13

^* Dat dede met vlijte Thathnai de Lantvoocht aen ghene sijde des Waters, ende StharBosnai met haren raet, tot welcken de Coninck Darius gheseynt hadde.

* 3.Esd. 7.a.1.

14

Ende de Ouders der Ioden timmerden, ende het ghinck voort door de prophecie des Propheten Haggai ende Sacharia, des soons Iddo. Ende timmerdent ende rechtent op, na dat beuel des Godts Israels, ende na den beuele Cores, Darij, ende Arthahsastha, der Coninghen in Persen.

15

Ende volbrachten dat huys tot aenden derden dach der maent Adar, dat was dat seste iaer des Conincrijcx, des Conincx Darij.

16

^* Ende de kinderen Israels, de Priesters, de Leuiten, ende de ander kinderen der gheuanckenissen, hielden een wijdinghe des huys Gods met blijschappen.

* 2.Par. 7.a.4.

17

⁺ Ende offerden op de wijdinghe des huys Gods, hondert Calueren, twee hondert Lammeren, vier hondert Bocken, ende totten Sondoffer voor dat gheheel Israel, twelf gheyten bocken, na dat ghetal der stammen Israels.

+ D vers 17

18

Ende stelden de Priesters in haer ordine, Ende de Leuiten in haer wacht, te dienen Gode die te Ierusalem is, so het gheschreuen staet inden boeck Mose.

19

Ende de kinderen der gheuanckenisse^† hielden Passah, inden veerthiensten daghe der eerster maent.

† Exod. 12.a.3. Num. 9.a.2. 28.c.16. Leuit. 23.b.15. Deut. 16.a.1. Ezech. 45.c.21

20

Want de Priesters ende Leuiten hadden hen ghereynicht, dat sy alle reyn waren als een man. Ende sloeghen dat Passah voor alle de kinderen der gheuanckenissen, ende voor hare broeders de Priesteren, ende voor hen seluen.

21

Ende de kinderen Israels, die wt de geuanckenissen waren wederghecomen, ende alle die hem tot hen afgescheyden hadden vander onreynicheyt der Heydenen inden lande, om den HEERE den Godt Israels te soecken, aten,

22

Ende hielden de Feeste der ongesuerder brooden, seuen dagen lanc met blijscappen.

[p. 178v]

Want de HEERE hadse vrolijck ghemaect, ende dat herte des Conincx te Assur tot henwaerts gekeert, dat hare handen ghesterct souden worden int werck, aent huys Gods, die een God Israels is.